నరేన్, సాహితి జోడీగా ‘మెట్రో లవర్’.. ఫస్ట్ లుక్ వైరల్

తెలుగు చిత్రసీమలో సరికొత్త కథాంశాలతో వరుస ప్రాజెక్టులను తెరకెక్కిస్తున్న ప్రముఖ నిర్మాణ సంస్థ ఈగల్ ఐ ఎంటర్‌టైన్‌మెంట్స్ తన ప్రొడక్షన్ నంబర్ 2 చిత్రానికి టైటిల్, ఫస్ట్ లుక్‌ను విడుదల చేసింది. ‘ఊరికి ఉత్తరాన’ తర్వాత రూపొందుతున్న ఈ చిత్రానికి ‘మెట్రో లవర్’ అనే ఆసక్తికరమైన టైటిల్‌ను ఖరారు చేశారు. ఫస్ట్ లుక్‌లో నరేన్ వనపర్తి, సాహితి ఆవంచ రొమాంటిక్ పోజ్‌లో కనిపించడంతో పోస్టర్ యువతను ఆకట్టుకుంటోంది.

మెట్రో సిటీ బ్యాక్‌డ్రాప్‌లో సాగే రొమాంటిక్ ఎంటర్‌టైనర్‌గా దర్శకుడు మహేష్ నాంపల్లి ఈ చిత్రాన్ని తెరకెక్కిస్తున్నారు. మాల్యా కందుకూరి భారీ నిర్మాణ విలువలతో సినిమాను నిర్మిస్తున్నారు. టాలీవుడ్ సంగీత దర్శకుడు భీమ్స్ సిసిరోలియో సంగీతం అందిస్తున్న ఈ చిత్రంలోని పాటలు యువతను ఆకట్టుకునేలా ఉంటాయని చిత్రబృందం చెబుతోంది. ప్రస్తుతం నిర్మాణ పనులు శరవేగంగా కొనసాగుతుండగా, త్వరలోనే సినిమాను థియేటర్లలో విడుదల చేసేందుకు మేకర్స్ సన్నాహాలు చేస్తున్నారు.