ఎమ్మెల్యే నవీన్ యాదవ్ చేతుల మీదుగా ‘మొహబ్బత్’ ఫస్ట్ లుక్ విడుదల..

సంతోష్ కల్వచెర్ల, శ్రేయాసి సేన్ జంటగా నటిస్తున్న తాజా చిత్రం ‘మొహబ్బత్’ ఘనంగా ప్రారంభమైంది. ఏబీఎస్ ప్రొడక్షన్స్ బ్యానర్‌పై అఫ్రోజ్ షేక్ నిర్మిస్తున్న ఈ చిత్రానికి మ్యాక్ దర్శకత్వం వహిస్తూ స్క్రీన్‌ప్లేను కూడా అందిస్తున్నారు. హైదరాబాద్‌లో జరిగిన పూజా కార్యక్రమానికి ఎమ్మెల్యే నవీన్ యాదవ్, చిన్న శ్రీశైలం యాదవ్ ముఖ్య అతిథులుగా హాజరయ్యారు. ముహూర్తపు సన్నివేశానికి నవీన్ యాదవ్ క్లాప్ కొట్టగా, నిర్మాత అఫ్రోజ్ షేక్ కెమెరా స్విచ్ ఆన్ చేశారు. అనంతరం చిత్ర ఫస్ట్ లుక్‌ను కూడా ఆవిష్కరించారు.

ఈ సందర్భంగా ఎమ్మెల్యే నవీన్ యాదవ్ మాట్లాడుతూ చిత్రబృందానికి శుభాకాంక్షలు తెలిపారు. దర్శకుడు మ్యాక్ మాట్లాడుతూ ‘మొహబ్బత్’ ఒక ఎమోషనల్ జెన్-జీ ప్రేమకథగా ప్రేక్షకుల ముందుకు రానుందని, పాన్ ఇండియా స్థాయిలో విడుదల చేయనున్నట్లు వెల్లడించారు. నిర్మాత అఫ్రోజ్ షేక్ ఈ చిత్రం విజయంపై పూర్తి నమ్మకం వ్యక్తం చేయగా, హీరో సంతోష్ కల్వచెర్ల, హీరోయిన్ శ్రేయాసి సేన్ తమ ఆనందాన్ని వ్యక్తం చేశారు. సునీల్ కశ్యప్ సంగీతం ఈ చిత్రానికి ప్రత్యేక ఆకర్షణగా నిలవనుంది.