డిజిటల్ ప్రపంచంలోకి మెగాస్టార్ చిరంజీవి ఎంట్రీ

తెలుగు చలనచిత్ర పరిశ్రమలో ఎన్నో రికార్డులకు కేరాఫ్ అడ్రస్ అయిన మెగాస్టార్ చిరంజీవి ఇప్పుడు డిజిటల్ ప్రపంచంలోకి అడుగుపెట్టేందుకు సిద్ధమవుతున్నారు. ఇప్పటివరకు వెండితెరపై తన నటనతో, డ్యాన్స్‌తో కోట్లాది అభిమానులను అలరించిన ఆయన త్వరలోనే ఒక ప్రతిష్టాత్మక పోడ్‌కాస్ట్ ద్వారా ప్రేక్షకుల ముందుకు రాబోతున్నారు. ఈ షోలో ఆయన తన సుదీర్ఘ సినీ ప్రయాణంలోని అరుదైన అనుభవాలు, తెలియని ఆసక్తికర విషయాలను పంచుకోనున్నారు.

నందమూరి బాలకృష్ణతో ‘అన్‌స్టాపబుల్’ షోను దేశవ్యాప్తంగా ట్రెండ్ చేయడంలో కీలక పాత్ర పోషించిన రచయిత బీవీఎస్ రవి ఈ ప్రాజెక్ట్‌కు ప్రధానంగా వ్యవహరిస్తున్నారు. ఇటీవల ఎన్టీవీ పోడ్‌కాస్ట్‌లో పాల్గొన్న ఆయన ఈ మెగా ప్రాజెక్ట్ వివరాలను వెల్లడించారు. చిరంజీవి జీవితంలో జరిగిన అనేక సంఘటనలను సమగ్రంగా చర్చించేలా ఈ పోడ్‌కాస్ట్‌ను రూపొందిస్తున్నామని తెలిపారు. ఇండస్ట్రీ దిగ్గజాలు, దర్శకులు, నిర్మాతలను ఆహ్వానిస్తారా లేదా ప్రతి హిట్ సినిమాను ఆధారంగా ఎపిసోడ్‌లు ఉంటాయా అన్నది ఇంకా స్పష్టత రావాల్సి ఉంది.