మంచు మనోజ్ సరసన మారియా ర్యాబోషాప్కా..

రాకింగ్ స్టార్ మంచు మనోజ్ ప్రధాన పాత్రలో నటిస్తున్న తాజా చిత్రం “డేవిడ్ రెడ్డి”. ఈ చిత్రాన్ని వెల్వెట్ సోల్ మోషన్ పిక్చర్స్, ట్రూ రాడిక్స్ బ్యానర్స్‌పై నల్లగంగుల వెంకట్ రెడ్డి, భరత్ మోటుకూరి నిర్మిస్తున్నారు. దర్శకుడు హనుమ రెడ్డి యక్కంటి ఈ సినిమాను రూపొందిస్తున్నారు. బ్రిటీష్ పాలనా కాలం నేపథ్యంగా సాగే ఇంటెన్స్ యాక్షన్ డ్రామా కథతో ఈ చిత్రం భారీ పాన్ ఇండియా ప్రాజెక్ట్‌గా తెరకెక్కుతోంది. తెలుగు, హిందీ, తమిళ, మలయాళ, కన్నడ భాషల్లో ఈ సినిమా విడుదల కానుంది.

ఈ సినిమాకు సంబంధించిన తాజా అప్డేట్‌ను మేకర్స్ ప్రకటించారు. ఈ చిత్రంలో హీరోయిన్‌గా అంతర్జాతీయ నటి మారియా ర్యాబోషాప్కా నటించనున్నట్లు అధికారికంగా వెల్లడించారు. మంచు మనోజ్, మారియా ర్యాబోషాప్కా మధ్య వచ్చే సన్నివేశాలు మంచి కెమిస్ట్రీతో ప్రేక్షకులను ఆకట్టుకుంటాయని చిత్ర బృందం చెబుతోంది.

బ్రిటీష్ సామ్రాజ్యానికి ఎదురు నిలిచిన ఒక యోధుడి తిరుగుబాటు కథగా రూపొందుతున్న “డేవిడ్ రెడ్డి” చిత్రంలో మంచు మనోజ్ కొత్త అవతార్‌లో కనిపించనున్నారు. ఇప్పటికే విడుదలైన గ్లింప్స్, ఫస్ట్ లుక్ పోస్టర్లకు ప్రేక్షకుల నుంచి మంచి స్పందన లభించింది. 1897 నుంచి 1920 మధ్య బ్రిటీష్ పాలన కాలాన్ని నేపథ్యంగా తీసుకుని ఈ సినిమాను ప్రతిష్టాత్మకంగా మేకర్స్ తెరకెక్కిస్తున్నారు. ఈ చిత్రం మంచు మనోజ్‌కు మంచి కమ్‌బ్యాక్ మూవీ అవుతుందనే అంచనాలు వ్యక్తమవుతున్నాయి.