​మంచు మనోజ్ బ్రూటల్ ఎరా మొదలైంది.. రేపే డేవిడ్ రెడ్డి ఫస్ట్ లుక్!

మంచు మనోజ్ తన సెకండ్ ఇన్నింగ్స్‌లో ప్రేక్షకుల ముందుకు అత్యంత శక్తివంతమైన కథతో రాబోతున్నారు. ఆయన కథానాయకుడిగా నటిస్తున్న తాజా యాక్షన్ చిత్రానికి డేవిడ్ రెడ్డి అనే టైటిల్‌ను ఖరారు చేశారు. ఈ సినిమాతో ఒక కొత్త శకం మొదలవుతుందని చిత్ర బృందం ప్రకటించింది. చాలా కాలం విరామం తర్వాత మనోజ్ హీరోగా నటిస్తున్న ఈ చిత్రం ద్వారా బ్రూటల్ ఎరా ప్రారంభమవుతోందని మేకర్స్ వెల్లడించారు. గణతంత్ర దినోత్సవం సందర్భంగా జనవరి 26, 2026 న ఈ సినిమా నుంచి రెండు భారీ అప్‌డేట్స్ విడుదల కానున్నాయి.

ఉదయం 11 గంటల 11 నిమిషాలకు రూత్‌లెస్ పేరుతో ఒక ప్రత్యేక సర్ప్రైజ్ అప్డేట్ విడుదల చేయనుండగా, సాయంత్రం 4 గంటల 44 నిమిషాలకు బ్రూటల్ పేరుతో ఫస్ట్ లుక్ పోస్టర్‌ను ప్రేక్షకుల ముందుకు తీసుకురానున్నారు. ఈ సినిమా కథ 1897 నుంచి 1922 మధ్య కాలాన్ని నేపథ్యంగా తీసుకుని రూపొందుతోంది. స్వాతంత్ర్యానికి ముందు బ్రిటిష్ పాలకుల అణచివేతకు ఎదురు నిలిచే ఒక ఉగ్ర స్వభావం గల పాత్ర కథగా ఈ పీరియాడిక్ యాక్షన్ డ్రామా తెరకెక్కుతోంది.

ఈ సినిమాలో మనోజ్ పాత్ర అత్యంత వైల్డ్‌గా ఉండనుందని ఇప్పటికే విడుదలైన వివరాలే చెబుతున్నాయి. ఆయన వాడే కర్రకు డెత్ నోట్ అనే పేరు ఉండగా, ఆయన నడిపే బైక్‌కు వార్ డాగ్ అనే పేరు పెట్టడం సినిమా పై ఆసక్తిని మరింత పెంచింది.

సంగీత విభాగంలోనూ ఈ సినిమాకు భారీ బలం ఉంది. కేజీఎఫ్ సినిమాకు సంచలన సంగీతం అందించిన రవి బస్రూర్ ఈ చిత్రానికి సంగీతం అందిస్తున్నారు. అలాగే కేజీఎఫ్ చిత్ర ఎడిటర్ ఉజ్వల్ కులకర్ణి కూడా ఈ ప్రాజెక్ట్‌లో భాగమవడం విశేషం.