మ్యాజిక్ మూవ్ మెంట్స్ సినిమా టైటిల్ లాంచ్

తల్లాడ సాయికృష్ణ హీరోగా నటిస్తూ దర్శకత్వం వహిస్తున్న సినిమా మ్యాజిక్ మూవ్ మెంట్స్ (మీరు అనుకున్నది కాదు) టైటిల్ లాంచ్ ఈవెంట్‌ను శుక్రవారం హైదరాబాద్‌ లో ఘనంగా నిర్వహించారు. ప్రముఖ దర్శకుడు కె. దశరథ్ సమర్పకుడిగా వ్యవహరిస్తున్న ఈ చిత్రాన్ని శ్రీ అన్నపూర్ణ క్రియేషన్స్, శ్రీ లక్ష్మీ శ్రీనివాస ఫిలిమ్స్ బ్యానర్లపై తల్లాడ శ్రీనివాస్ నిర్మిస్తున్నారు. వెంకట్ దుగ్గిరెడ్డి సహ నిర్మాత. ప్రస్తుతం సినిమా షూటింగ్ తుది దశలో ఉంది.

ఈ కార్యక్రమంలో డీవోపీ సతీష్ రెడ్డి మాసం మాట్లాడుతూ, తల్లాడ సాయికృష్ణకు ఎప్పుడూ సినిమా ఆలోచనలే ఉంటాయని, అతని తపనను చూసి ఈ సినిమాకు పూర్తి సహకారం అందించానని చెప్పారు. ఈ చిత్రంతో సాయికృష్ణకు మంచి గుర్తింపు రావాలని ఆకాంక్షించారు.

డాక్టర్ ఏఎంఆర్ మాట్లాడుతూ, ఎలాంటి సినీ బ్యాక్‌గ్రౌండ్ లేకుండా హీరోగా నిలదొక్కుకోవాలనే సాయికృష్ణ ప్రయత్నం అభినందనీయమని తెలిపారు. ఈ సినిమాలో కంటెంట్ చాలా బలంగా ఉందని, ప్రేక్షకులందరూ సినిమాకు మద్దతు ఇవ్వాలని కోరారు.

సహ నిర్మాతలు, నిర్మాతల స్పందన:
సహ నిర్మాత వెంకట్ దుగ్గిరెడ్డి మాట్లాడుతూ, అమెరికాలో ఉన్నప్పటికీ సినిమాలపై ఆసక్తితో ఈ ప్రాజెక్ట్‌లో భాగమయ్యానని చెప్పారు. ఇండస్ట్రీలో సాయికృష్ణ పడే కష్టాలు తనకు తెలుసని, అందుకే అతనికి మద్దతుగా నిలిచానన్నారు. ఈ సినిమాలో తాను కూడా ఒక మంచి పాత్రలో నటించానని తెలిపారు.

నిర్మాత తల్లాడ వెంకన్న మాట్లాడుతూ, సాయికృష్ణ తనను నటుడిగా పరిచయం చేశారని గుర్తు చేసుకున్నారు. ఈ సినిమాను కమర్షియల్ అంశాలతో పాటు థ్రిల్లర్ ఎలిమెంట్స్‌తో రూపొందిస్తున్నామని, ఇందులో తాను కీలక పాత్రలో కనిపించనున్నానని చెప్పారు. సాయికృష్ణతో మరో పెద్ద సినిమాను కూడా నిర్మించాలనే ఆలోచన ఉందన్నారు.

హీరోయిన్ & దర్శకుడి మాటలు:
హీరోయిన్ ఏకదంతాయ సిరి మాట్లాడుతూ, చిన్న సినిమాల్లో హీరోయిన్స్‌కు గ్లామర్ షో మాత్రమే ఇస్తారని అనుకునే భావనను ఈ సినిమా పూర్తిగా మార్చిందని చెప్పారు. దర్శకుడిగా సాయికృష్ణ చూపిన సిన్సియారిటీ తనను ఆకట్టుకుందని, సినిమా చాలా వేగంగా తెరకెక్కిన తీరు ఆశ్చర్యం కలిగించిందన్నారు.

హీరో, దర్శకుడు తల్లాడ సాయికృష్ణ మాట్లాడుతూ, సాయిబాబా ఆశీస్సులతో ఈ సినిమా కథ మొదలైందని తెలిపారు. ఆర్థిక ఇబ్బందుల మధ్య కూడా సినిమా చేయాలనే నమ్మకం, పట్టుదలతో ముందుకు వెళ్లామని చెప్పారు. ఈ చిత్రంలో సస్పెన్స్ థ్రిల్లర్ ఎలిమెంట్స్‌తో పాటు డివోషనల్ టచ్ కూడా ఉంటుందని తెలిపారు. షూటింగ్ చివరి దశకు చేరిందని, త్వరలోనే విడుదలకు సిద్ధం చేస్తామని వెల్లడించారు.

చిత్ర సమర్పకుడి వ్యాఖ్యలు:
చిత్ర సమర్పకుడు కె. దశరథ్ మాట్లాడుతూ, సాయికృష్ణకు సినిమా అంటే నిజమైన ప్యాషన్ ఉందని అన్నారు. కథ వినగానే ఇది మంచి సస్పెన్స్ థ్రిల్లర్‌గా ప్రేక్షకులను ఆకట్టుకుంటుందని నమ్మకం కలిగిందన్నారు. అందుకే ఈ చిత్రానికి తన వంతు మద్దతు అందించానని తెలిపారు.

నటీనటులు:
ఈ చిత్రంలో తల్లాడ సాయికృష్ణ, ఏకాదంతాయ సిరి, శ్రీలక్ష్మి, పృథ్వీరాజ్, కిషోర్ దాస్, అకెళ్ళ, వాసు ఇంటూరి, జబర్దస్త్ జీవన్, జబర్దస్త్ అప్పారావు, గడ్డం నవీన్, వెంకట్ దుగ్గిరెడ్డి, వినోద్ నువ్వుల, అమ్మినేని స్వప్న, తల్లాడ వెంకన్న, చంద్ర సుబ్బగారి, అను, భాను, మురళీ, సునీల్, చంద్ర, తారక్ దూగాన, పృథ్వీ, నిక్కీ చౌదరి తదితరులు నటించారు. అలాగే వినోద్ ఫిల్మ్ అకాడమీ విద్యార్థులు కూడా పాల్గొన్నారు.