సీఎం విజయ్‌పై కోలీవుడ్ భారీ ఆశలు..

కోలీవుడ్ స్టార్ హీరో విజయ్ ముఖ్యమంత్రి అయిన తర్వాత తమిళ సినీ పరిశ్రమ ఆయనపై భారీ ఆశలు పెట్టుకుంది. ఇండస్ట్రీకి చెందిన వ్యక్తి సీఎం కావడంతో సినిమా రంగ సమస్యలు పరిష్కారమవుతాయని సినీ ప్రముఖులు భావిస్తున్నారు. స్టార్ నటుడు విజయ్ సేతుపతి, సినిమా టికెట్ ధరల పెంపుపై చర్యలు తీసుకోవాలని సీఎంను కోరినట్లు సమాచారం. అలాగే కమల్ హాసన్ సూచించినట్లుగా రాష్ట్ర ప్రభుత్వ ఆధ్వర్యంలో ఓటీటీ ప్లాట్‌ఫామ్ ప్రారంభిస్తే సినీ పరిశ్రమకు ఎంతో ఉపయోగకరంగా ఉంటుందని అభిప్రాయం వ్యక్తం చేశారు.

ఇదే సమయంలో నటుడు విశాల్ కూడా సినీ పరిశ్రమ సమస్యలపై స్పందించారు. సినిమాటోగ్రఫీ శాఖకు ఇండస్ట్రీతో సంబంధం లేని వ్యక్తిని మంత్రిగా నియమించడాన్ని ఆయన తప్పుబట్టారు. సినిమా శాఖను సీఎం విజయ్ స్వయంగా పర్యవేక్షించాలని కోరారు. ఇండస్ట్రీకి చెందిన వ్యక్తి మాత్రమే సినిమా రంగ సమస్యలను సమర్థంగా అర్థం చేసుకుని పరిష్కరించగలడని విశాల్ పేర్కొన్నారు. విజయ్ ముఖ్యమంత్రి అయిన సందర్భంగా కోలీవుడ్ సినీతారలు, అభిమానులు సంబరాలు జరుపుకున్నారు.