‘బెత్లెహోమ్ కుటుంబ యూనిట్’పై కేరళం సీఎం ప్రశంసలు..

మలయాళంలో విశేష ఆదరణ పొందుతూ బాక్సాఫీస్ వద్ద రికార్డులు సృష్టించిన ‘బెత్లెహోమ్ కుటుంబ యూనిట్’ సినిమాపై కేరళం ముఖ్యమంత్రి సతీశన్ ప్రశంసలు కురిపించారు. సినిమాలోని కథ, గ్రామీణ జీవన చిత్రీకరణ, మానవ సంబంధాలు తనను ఎంతగానో ఆకట్టుకున్నాయని తెలిపారు. బిజీ షెడ్యూల్ కారణంగా కొంతకాలంగా సినిమాలు చూడలేకపోయానని, చాలా రోజుల తర్వాత సోమవారం తన కుమార్తెతో కలిసి ఈ చిత్రాన్ని వీక్షించినట్లు ఫేస్‌బుక్ పోస్ట్‌లో వెల్లడించారు. గ్రామీణ ప్రాంతాల దృశ్యాలు, ప్రజల దైనందిన జీవితాలు, వారి మధ్య అనుబంధాలు, సున్నితమైన ప్రేమకథలు తనకు ప్రత్యేకమైన అనుభూతిని కలిగించాయని పేర్కొన్నారు. సినిమా పూర్తయ్యాక ఇంత మంచి చిత్రాన్ని చూడటానికి ఇంతకాలం ఎందుకు ఆలస్యం చేశానా? అని అనిపించిందని తెలిపారు.

ఈ సినిమాలో చిన్న పాత్రల్లో కనిపించిన నటులు సైతం తమదైన ముద్ర వేశారని సీఎం అభిప్రాయపడ్డారు. ఈ చిత్రం తనను నవ్వించడంతో పాటు కొన్ని సందర్భాల్లో భావోద్వేగానికి గురిచేసిందని, మొత్తంగా ఆహ్లాదకరమైన అనుభూతిని అందించిందని చెప్పారు. ఇది చిత్రబృందం సమష్టి కృషికి నిదర్శనమని ప్రశంసించారు. సాధారణంగా సినిమాలు చూసిన తర్వాత సమీక్షలు రాయడం తనకు అలవాటు లేదని, అయితే ఈ చిత్రం ప్రత్యేకంగా అనిపించడంతో తన అభిప్రాయాలను పంచుకోవాలనుకున్నానని వెల్లడించారు. దర్శకుడు ఎ.డి. గిరీశ్, నటుడు సంగీత్ ప్రతాప్‌కు ఫోన్ చేసి అభినందించినట్లు తెలిపారు. హీరో నివిన్ ఫౌలీ, మమితా బైజును మాత్రం ఫోన్‌లో సంప్రదించలేకపోయానని పేర్కొన్నారు. సినిమాలో తన మనసులో ప్రత్యేకంగా నిలిచిన గ్లిక్సన్‌ను కూడా ప్రస్తావిస్తూ, చిత్రబృందంలోని ప్రతి ఒక్కరినీ అభినందించారు.