అక్షర సింగ్ బాలీవుడ్ ఎంట్రీ ఆ సినిమా తోనా?

భోజ్‌పురి స్టార్ నటి, సోషల్ మీడియా సెన్సేషన్ అక్షర సింగ్ ‘వెల్కమ్ టు ది జంగిల్’ సినిమాతో బాలీవుడ్‌లో అడుగుపెట్టనుంది. అక్షయ్ కుమార్ ప్రధాన పాత్రలో నటిస్తున్న ఈ భారీ మల్టీస్టారర్ చిత్రంలో సునీల్ శెట్టి, జాకీ ష్రఫ్, రవీనా టాండన్, దిశా పటాని, జాక్వెలిన్ ఫెర్నాండెజ్, అర్షద్ వార్చి, పరేష్ రావల్ వంటి స్టార్ నటీనటులు కీలక పాత్రల్లో కనిపించనున్నారు. దాదాపు రెండు దశాబ్దాల తర్వాత అక్షయ్ కుమార్–రవీనా టాండన్ కాంబో రీయూనియన్ ఈ సినిమాకు మరింత హైప్ తెచ్చింది. ఫిరోజ్ నడియాద్వాలా నిర్మాణంలో అహ్మద్ ఖాన్ దర్శకత్వం వహించిన ఈ చిత్రం షూటింగ్ పూర్తిచేసుకుని జూన్ 26న విడుదలకు సిద్ధమవుతోంది.

ఈ నేపథ్యంలో ప్రమోషన్స్‌లో భాగంగా విడుదలైన మాస్ సాంగ్‌లో అక్షర సింగ్–అక్షయ్ కుమార్ జోడీ ప్రత్యేక ఆకర్షణగా నిలిచింది. ఈ పాట సోషల్ మీడియాలో భారీగా వైరల్ అవుతోంది. ఇంటర్వ్యూలో అక్షర సింగ్ బాలీవుడ్ ఎంట్రీపై సంతోషం వ్యక్తం చేస్తూ, బిహార్ ప్రజల ప్రేమే తనకు ఇంతటి అవకాశాన్ని ఇచ్చిందని భావోద్వేగంగా తెలిపారు. ఇంత పెద్ద స్టార్ కాస్ట్‌తో పని చేయడం తనకు గర్వకారణమని ఆమె పేర్కొన్నారు.