టాక్సిక్‌పై ఇరుముడి హవా.. బుకింగ్స్‌లో రవితేజ జోరు

మాస్ మహారాజ రవితేజ, ప్రియా భవాని శంకర్ జంటగా శివ నిర్వాణ దర్శకత్వంలో తెరకెక్కిన ఇరుముడి సినిమా బాక్సాఫీస్ వద్ద మంచి జోరును కొనసాగిస్తోంది. ఈ సినిమా విడుదలైన వారం తర్వాత యశ్ నటించిన భారీ పాన్ ఇండియా చిత్రం టాక్సిక్ థియేటర్లలోకి వచ్చింది. దీంతో తెలుగు రాష్ట్రాల్లో ఇరుముడి వసూళ్లపై ప్రభావం పడుతుందని మొదటి నుంచి అంచనాలు ఉన్నాయి.

అయితే తాజా వీకెండ్ బుకింగ్స్ చూస్తే ఇరుముడి తన సత్తాను కొనసాగిస్తున్నట్లు తెలుస్తోంది. బుక్‌మైషోలో ఇరుముడి 23 వేలకు పైగా టికెట్లు అమ్ముడవుతుండగా, టాక్సిక్ 15 వేలకు పైగా టికెట్లతో కొనసాగుతోంది. తక్కువ థియేటర్లు ఉన్నప్పటికీ ఇరుముడి బుకింగ్స్‌లో ఆధిపత్యం చూపించడం ఆసక్తికరంగా మారింది. ఇదే జోరు కొనసాగితే రవితేజ సినిమా బాక్సాఫీస్ వద్ద మరిన్ని సర్‌ప్రైజ్‌లు ఇవ్వొచ్చనే అంచనాలు వ్యక్తమవుతున్నాయి.