సుహాస్, సూరి ‘మండాడి’పై భారీ అంచనాలు

ఎల్రెడ్ కుమార్ సమర్పణలో ఆర్ఎస్ ఇన్ఫోటైన్‌మెంట్ బ్యానర్‌పై మదిమారన్ పుగళేంది దర్శకత్వంలో తెరకెక్కుతున్న ‘మండాడి’ చిత్రం సెప్టెంబర్ 10న ప్రపంచవ్యాప్తంగా భారీ ఎత్తున విడుదలకు సిద్ధమైంది. సుహాస్, సూరి ప్రధాన పాత్రల్లో నటించిన ఈ చిత్రంపై ఇప్పటికే మంచి అంచనాలు నెలకొన్నాయి. విడుదలైన కంటెంట్ ప్రేక్షకులను ఆకట్టుకోవడంతో పాటు, పాత్రల మేకోవర్, యాక్షన్ సన్నివేశాలు, విజువల్స్ ప్రత్యేక ఆకర్షణగా నిలుస్తాయని చిత్రబృందం నమ్మకంగా చెబుతోంది. ముఖ్యంగా బోట్ సీక్వెన్స్ ప్రేక్షకులను ఆశ్చర్యపరుస్తుందని తెలిపింది.

తెలుగు, తమిళ్, కన్నడ, మలయాళం, హిందీ భాషల్లో విడుదల కానున్న ఈ చిత్రాన్ని ఆంధ్రప్రదేశ్, తెలంగాణలో మైత్రి మూవీ డిస్ట్రిబ్యూటర్స్ ఎల్ఎల్‌పి భారీ స్థాయిలో విడుదల చేయనుంది. మహిమా నంబియార్ హీరోయిన్‌గా నటిస్తుండగా, సత్యరాజ్, రవీంద్ర విజయ్, మిథున్, బాల శరవణన్ తదితరులు కీలక పాత్రలు పోషిస్తున్నారు. జి.వి. ప్రకాష్ కుమార్ సంగీతం, ఎస్.ఆర్. కథిర్ సినిమాటోగ్రఫీ ఈ చిత్రానికి ప్రధాన బలం కానున్నాయి.