కేంద్రమంత్రి పెమ్మసాని హీరోగా సినిమా - దర్శకుడు రాఘవేంద్రరావు

కేంద్రమంత్రి పెమ్మసాని చంద్రశేఖర్ హీరో, నిర్మాతగా ఓ సినిమా చేయాలని తాను భావిస్తున్నానని ప్రముఖ దర్శకుడు రాఘవేంద్రరావు పేర్కొన్నారు. పెమ్మసాని ముందుకు వస్తే తాను సినిమా చేసి పెట్టడానికి సిద్ధంగా ఉన్నానని వ్యాఖ్యానించారు. విజయవాడ ఉత్సవ్ 2.0 వేదికపైకి వచ్చాక తనకు ఓ మూవీ స్టోరీ ఆలోచన వచ్చిందని తెలిపారు. విజయవాడ పున్నమిఘాట్, సింగ్‌నగర్ ఎంబీకే స్టేడియంలో వైభవంగా విజయవాడ ‌ఉత్సవ్ 2.0 జరుగుతోంది. సందర్శకులకు అద్భుతమైన కళాప్రదర్శనలు కనువిందు చేస్తున్నాయి. ఆదివారం విజయవాడ ‌ఉత్సవ్ 2.0లో రాఘవేంద్రరావు పాల్గొని, మాట్లాడారు. విజయవాడతో తనకు ఎంతో అనుబంధం ఉందని వెల్లడించారు.

విజయవాడ ఉత్సవ్ ద్వారా నేడు నగరం ఎంతగానో కళకళలాడుతోందని రాఘవేంద్రరావు చెప్పుకొచ్చారు. జాతీయ, రాష్ట్ర అవార్డులను చాలావరకు తాను తీసుకున్నానని ప్రస్తావించారు. నేడు విజయవాడ ఉత్సవ్‌లో ఈ అవార్డు అందుకోవడం తనకు ప్రత్యేకంగా ఉందని తెలిపారు. తాను విజయవాడ అమెరికన్ ఆస్పత్రిలో జన్మించానని గుర్తుచేసుకున్నారు. దివంగత మాజీ సీఎం నందమూరి తారక రామారావు పుట్టిన నేల‌పై తానూ పుట్టడం తన అదృష్టమని వ్యాఖ్యానించారు. ఇలాంటి కార్యక్రమాలు మరిన్ని జరగాలని ఆకాంక్షించారు. తనకు విజయవాడ నగరం, కృష్ణానది ఎన్నో అనుభూతులను ఇచ్చిందని రాఘవేంద్రరావు తెలిపారు