డాన్ 3 చర్చల మధ్య మళ్లీ వెలుగులోకి దీపికా పాత వివాదం

బాలీవుడ్‌లో ప్రస్తుతం డాన్ 3 సినిమా చుట్టూ చర్చలు హాట్ టాపిక్‌గా మారగా, నటి దీపికా పదుకొణెకు సంబంధించిన పాత వివాదం మళ్లీ సోషల్ మీడియాలో ట్రెండ్ అవుతోంది. 2012లో జరిగిన రేస్ 2 షూటింగ్ సమయంలో నిర్మాత రమేశ్ టౌరాణి ఆమె ప్రవర్తనపై తీవ్ర అసంతృప్తి వ్యక్తం చేశారు. ఆరు రోజుల షూటింగ్ అనంతరం ఆమె అకస్మాత్తుగా ప్రాజెక్ట్ నుంచి వైదొలిగారని ఆరోపించారు. ఆమె తేదీలకు అనుగుణంగా షెడ్యూల్స్ మార్చినా చివరి నిమిషంలో వైదొలగడం వల్ల యూనిట్‌కు ఇబ్బందులు ఎదురయ్యాయని తెలిపారు. సమావేశాలకు హాజరు కాకపోవడం, ఫోన్ కాల్స్, మెసేజ్‌లకు స్పందించకపోవడం వంటి అంశాలపై కూడా విమర్శలు చేశారు.

ఆమె వైదొలగడంతో చిత్రబృందం సినీ సంఘాలకు ఫిర్యాదు చేసేందుకు సిద్ధమైనప్పటికీ, తరువాత దీపిక నిర్మాతలతో చర్చలు జరిపి కొత్త నిబంధనలతో మళ్లీ ప్రాజెక్ట్‌లో చేరి సినిమాను పూర్తి చేశారు. 2013లో విడుదలైన ఈ చిత్రం కమర్షియల్ హిట్‌గా నిలిచింది. మరోవైపు రణ్‌వీర్ సింగ్‌పై నిషేధం అంశంపై ఫెడరేషన్ ఆఫ్ వెస్ట్రన్ ఇండియా సినీ ఎంప్లాయీస్ స్పష్టతనిస్తూ అధికారిక బ్యాన్ లేదని తెలిపింది. సమస్య పరిష్కారం అయ్యే వరకు సభ్యులు ఆయనతో పని చేయవద్దని సూచించామని వెల్లడించింది. ఈ నేపథ్యంలో రణ్‌వీర్ సింగ్ ‘డాన్ 3’లో కొత్త నిబంధనలతో నటించే అవకాశముందని సమాచారం.