ఉత్కంఠ రేపుతున్న విశ్వక్‌ సేన్‌ ‘కల్ట్‌’ ట్రైలర్‌!

‘కల్ట్‌’ సినిమా ట్రైలర్‌ ప్రేక్షకుల్లో ఆసక్తిని పెంచుతోంది. గోవాలోని ‘కల్ట్‌’ అనే పబ్‌లో ఒక రాత్రి 300 మందికి పైగా పార్టీ చేసుకుంటుండగా, కొందరు వ్యక్తులు వారందరినీ లోపలే బంధించి ఓ ప్రమాదకరమైన గేమ్‌ ఆడిస్తారు. ఆ ఆటలో ఓడిపోతే ప్రాణాలు కోల్పోవాల్సి వస్తుందనే పరిస్థితులు కథలో ఉత్కంఠను పెంచుతున్నాయి. ఇదే పబ్‌లో ఇన్‌స్పెక్టర్‌ సంకల్ప్‌ నాయక్‌ కూడా ఉండటంతో కథ మరింత ఆసక్తికరంగా మారుతుంది. అసలు ఆ వ్యక్తులందరినీ ఎందుకు బంధించారు? ఈ గేమ్‌ వెనుక ఉన్న రహస్యం ఏమిటి? వారి నుంచి ఎంతమంది బయటపడగలిగారు? అనే ప్రశ్నలకు సమాధానాలు సినిమా చూస్తేనే తెలుస్తాయి.

ఈ చిత్రంలో కీలక పాత్ర పోషిస్తున్న విశ్వక్‌ సేన్‌ స్వయంగా దర్శకత్వం కూడా వహించారు. గాయత్రి భరద్వాజ్‌ కథానాయికగా నటించగా, రవి బస్రూర్‌ సంగీతాన్ని అందించారు. ట్రైలర్‌లోని పలు సన్నివేశాలు హింసాత్మకంగా, ఉత్కంఠభరితంగా కనిపిస్తున్నాయి. ఒకే ప్రదేశంలో వందలాది మంది చిక్కుకుపోవడం, ప్రాణాల కోసం పోరాడే పరిస్థితులు సినిమాపై ఆసక్తిని పెంచుతున్నాయి. థ్రిల్లర్‌ కథాంశంతో తెరకెక్కిన ఈ చిత్రం ప్రేక్షకులను ఎంతవరకు ఆకట్టుకుంటుంది? బాక్సాఫీస్‌ వద్ద ఎలాంటి ఫలితాన్ని అందుకుంటుంది? అనేది వేచి చూడాలి.