అజయ్ దేవగణ్ బంగ్లాలో బీఎంసీ చర్యలు...

బాలీవుడ్‌ స్టార్‌ అజయ్ దేవగణ్‌కు ముంబయి మున్సిపల్‌ అధికారులు షాక్‌ ఇచ్చారు. ముంబయిలోని జుహు ప్రాంతంలో ఉన్న ఆయన బంగ్లాలో అనుమతులు లేకుండా చేపట్టిన నిర్మాణాల్లో కొంత భాగాన్ని బృహన్‌ ముంబయి మున్సిపల్‌ కార్పొరేషన్‌ (బీఎంసీ) అధికారులు కూల్చివేశారు. కపోల్‌ కో-ఆపరేటివ్‌ హౌసింగ్‌ సొసైటీలో ఉన్న ఈ బంగ్లా 7,802 చదరపు అడుగుల విస్తీర్ణంలో ఉంది. భవనంలో పార్టిషన్‌ గోడల నిర్మాణం, కిటికీల మార్పులు, ఇతర నిర్మాణ పనులు చేపట్టినట్లు అధికారులు గుర్తించారు. అయితే, ఈ పనులకు అవసరమైన అనుమతులు తీసుకోలేదని బీఎంసీ పేర్కొంది. దీంతో అనధికార నిర్మాణాలపై అధికారులు చర్యలు చేపట్టారు.

నిర్మాణ పనులను వెంటనే నిలిపివేయాలని, సంబంధిత అనుమతి పత్రాలను సమర్పించాలని కోరుతూ బీఎంసీ గతంలోనే నోటీసులు జారీ చేసింది. సెప్టెంబర్‌ 10న ఈ నోటీసులు ఇచ్చినట్లు అధికారులు వెల్లడించారు. అయినప్పటికీ పనులు కొనసాగినట్లు గుర్తించడంతో తాజాగా కూల్చివేత చర్యలు చేపట్టినట్లు తెలిపారు. భవన నిర్మాణ నిబంధనలను ఉల్లంఘించినట్లు ఆరోపణలు రావడంతో ఈ చర్యలు తీసుకున్నట్లు సమాచారం. అయితే, కూల్చివేసిన నిర్మాణాల పూర్తి వివరాలు, ఈ వ్యవహారంపై అజయ్ దేవగణ్ లేదా ఆయన ప్రతినిధుల స్పందనకు సంబంధించిన సమాచారం అందుబాటులో లేదు.