నా విజయానికి అసలు కారణం సురేఖే: భార్యకు భావోద్వేగ శుభాకాంక్షలు తెలిపిన చిరంజీవి!

తన విజయానికి అసలు కారణం భార్య సురేఖేనని అగ్ర కథానాయకుడు చిరంజీవి పేర్కొన్నారు. ఆమె పుట్టినరోజు సందర్భంగా ఇన్‌స్టాగ్రామ్‌లో ఫొటోలు పంచుకుంటూ భావోద్వేగ శుభాకాంక్షలు తెలిపారు. 1980 ఫిబ్రవరి 20న ప్రారంభమైన తమ దాంపత్య జీవితం నుంచి ప్రతి అడుగులో తనకు అండగా నిలిచిందని ఆయన గుర్తుచేశారు. కుటుంబ బాధ్యతలను సమర్థంగా నిర్వహిస్తూ తనకు నటనపై పూర్తిగా దృష్టి పెట్టే అవకాశం కల్పించిందని పేర్కొన్నారు.

కుటుంబాన్ని ప్రేమతో, ఆప్యాయతతో ఒకటిగా నిలబెట్టిన వ్యక్తి సురేఖేనని చిరంజీవి అన్నారు. తన తల్లిని సొంత బిడ్డలా చూసుకోవడమే కాకుండా కష్టసుఖాల్లో కుటుంబాన్ని ముందుకు నడిపించిందని తెలిపారు. తన విజయ రహస్యం గురించి ఎవరైనా అడిగితే అది తన ప్రతిభ కాదు, సురేఖ మద్దతేనని చెప్పానని ఆయన భావోద్వేగంగా పేర్కొన్నారు. పుట్టినరోజుతో పాటు వివాహ వార్షికోత్సవాన్ని కలిసి జరుపుకోవడం ఆనందంగా ఉందని చిరంజీవి తెలిపారు.