బండ్ల గణేష్ వాట్సాప్ పంచ్‌తో కలకలం!

స్పీచులతో సోషల్ మీడియాలో ఎప్పుడూ సంచలనంగా నిలిచే నిర్మాత బండ్ల గణేష్ మరోసారి తన మాటలతో హాట్ టాపిక్‌గా మారారు. ఇటీవల జరిగిన కే ర్యాంప్ సక్సెస్ మీట్‌లో మాట్లాడుతూ హీరో కిరణ్ అబ్బవరంని ఆకాశానికెత్తి పొగిడారు. అయితే ఆ ప్రశంసల మధ్య మరో హీరోపై పంచులు విసరడం చర్చనీయాంశమైంది. "కొందరు ఒక హిట్ కొట్టగానే అర్థరాత్రి కళ్లద్దాలు పెట్టుకుని ‘వాట్సాప్ వాట్సాప్’ అంటూ తిరుగుతారు. సుకుమార్, రాజమౌళి, అనిల్ రావిపూడి కావాలని డిమాండ్ చేస్తారు. కానీ కిరణ్ అలా కాదు, ఎంత హిట్ వచ్చినా ఒదిగి ఉంటాడు. ఆ నమ్మకస్తత్వం చూస్తే చిరంజీవి గుర్తుకు వస్తాడు," అని గణేష్ వ్యాఖ్యానించారు. అయితే ఈ ‘వాట్సాప్’ మాట ఎవరిని ఉద్దేశించి అన్నారో స్పష్టంగా చెప్పకపోయినా, సోషల్ మీడియాలో మాత్రం టాక్ ఒక్కటే — అది విజయ్ దేవరకొండ గురించే అని! ఎందుకంటే ఆ పదాన్ని తరచుగా వాడేది ఆయనే.

ఇక విజయ్ అభిమానులు ఈ కామెంట్లకు కౌంటర్లతో ట్వీట్లు పెడుతుండగా, కొందరు మాత్రం గణేష్ నిజంగానే కిరణ్‌కి మద్దతుగా మాట్లాడారని చెబుతున్నారు. గమనించదగ్గ విషయం ఏమిటంటే, ఇదే బండ్ల గణేష్ కొద్ది రోజుల క్రితం లిటిల్ హార్ట్స్ ఈవెంట్‌లో "ఇండస్ట్రీలో చేసే పొగడ్తలు అన్నీ అబద్ధాలే" అని అన్నారు. ఆ ఈవెంట్‌కు గెస్ట్‌గా వచ్చినవారే విజయ్ దేవరకొండ! ఇప్పుడు కిరణ్‌ని మెగాస్టార్ చిరంజీవితో పోల్చడం వెనుక ఉన్న అసలు ఉద్దేశ్యం ఏమిటో అన్న చర్చ మొదలైంది. అయితే ఒక మాట మాత్రం గణేష్ సరిగ్గానే చెప్పారు — "రాజకీయాల్లో వార్నింగులు పనికి వస్తాయి కానీ సినిమాల్లో కాదు." కానీ ప్రస్తుతం వైరల్ అవుతున్నది మాత్రం ఆయన ‘వాట్సాప్’ కామెంట్‌నే!