విజయ్‌ సేతుపతి ‘బత్తా’ తెలుగు విడుదలపై అట్లీ హింట్‌

అల్లు అర్జున్‌–అట్లీ కాంబినేషన్‌లో తెరకెక్కుతున్న ‘రాకా’పై ఎలాంటి అప్‌డేట్‌ వచ్చినా అభిమానుల్లో ఆసక్తి నెలకొంటోంది. ఈ క్రమంలో అట్లీ నుంచి వచ్చిన తాజా స్పందన ‘రాకా’ గురించి కాకుండా విజయ్‌ సేతుపతి నటించిన ‘బత్తా’ చిత్రానికి సంబంధించినది. అట్లీ సమర్పణలో బాలాజీ తరణీతరణ్‌ దర్శకత్వం వహించిన ఈ సినిమాకు సాయి అభ్యంకర్‌ సంగీతం అందించారు. అక్టోబర్‌ 1న తమిళంలో విడుదలైన ఈ చిత్రం ప్రేక్షకుల నుంచి మంచి స్పందనను అందుకుంటోంది.

ఈ నేపథ్యంలో ‘బత్తా’ను తెలుగులో విడుదల చేయాలని ఓ నెటిజన్‌ ఎక్స్‌ వేదికగా అట్లీని కోరగా.. ‘‘త్వరగా వస్తుంది అన్నయ్యా..’’ అంటూ ఆయన తెలుగులో సమాధానం ఇచ్చారు. దీంతో ‘బత్తా’ తెలుగు వెర్షన్‌ త్వరలో అందుబాటులోకి రానుందనే చర్చ మొదలైంది. అయితే ఓటీటీ విడుదల సమయంలో తెలుగు ఆడియో కూడా అందుబాటులోకి వస్తుందనే ఉద్దేశంతో అట్లీ ఈ స్పందన ఇచ్చి ఉండొచ్చని కొందరు భావిస్తున్నారు. మరోవైపు సినిమా విజయంపై విజయ్‌ సేతుపతి ఆనందం వ్యక్తం చేస్తూ.. దర్శకుడు బాలాజీ, సంగీత దర్శకుడు సాయి అభ్యంకర్‌ను ప్రశంసించారు.