అల్లరి నరేష్ కి మరో సమస్య – ‘ఆల్కహాల్’ విడుదలపై కొత్త అనుమానాలు

క్రైమ్ థ్రిల్లర్ చేస్తే కొత్తగా ఉండొచ్చని భావించి, ‘12 ఏ రైల్వే కాలనీ’ సినిమాలో నటించిన అల్లరి నరేష్‌కు భారీ నిరాశే ఎదురైంది. రెండో వారానికే వాషౌట్ కావడంతో ఆ సినిమా పూర్తిగా ఫ్లాప్‌గా మారింది. ఒకప్పుడు కామెడీతో ప్రేక్షకులను అలరించిన అల్లరి నరేష్ ఈ మధ్యకాలంలో వివిధ జానర్లు ప్రయత్నిస్తున్నా, ఇంకా విజయవంతమైన ఫలితం రాకపోవడం బాధాకరం. కామెడీకి ప్రేక్షకులు స్పందించకపోవడంతో కల్ట్ డ్రామా, మెసేజ్ మూవీ, రివెంజ్ ఫార్ములా వంటి అనేక ప్రయోగాలు చేశాడు. ‘ఉగ్రం’లో కూడా తీవ్ర పాత్రలో కనిపించినా, అది కూడా ఆశించిన ఫలితాన్ని ఇవ్వలేదు.

ఇప్పుడు అల్లరి నరేష్ నటించిన తదుపరి చిత్రం ‘ఆల్కహాల్’. ఈ సినిమా టీజర్ చాలా రోజుల కిందటే విడుదల కాగా, విడుదల తేదీగా 2026 జనవరి 1న ప్రకటించారు. సంక్రాంతికి భారీ పోటీ ఉన్నప్పటికీ, 10 రోజుల థియేటర్ రన్ సరిపోతుందనే లెక్కతో ఆ నిర్ణయం తీసుకున్నారు. కానీ తాజా సమాచారం ప్రకారం, ఈ విడుదల తేదీ మారే అవకాశం ఉన్నట్టుగా ఇండస్ట్రీలో టాక్ వినిపిస్తోంది. ఎందుకంటే ఇది కూడా ఎక్స్‌పెరిమెంటల్ సినిమా కావడంతో సోలో రిలీజ్‌కు మంచి సమయం అవసరం. సితార ఎంటర్‌టైన్‌మెంట్స్ ప్రస్తుతం ‘జన నాయకుడు’ డిస్ట్రిబ్యూషన్, ‘అనగనగా ఒక రాజు’ ప్రమోషన్లతో బిజీగా ఉండటంతో ‘ఆల్కహాల్’పై పూర్తిగా దృష్టి పెట్టడం కష్టమవుతుందని చెబుతున్నారు.

అధికారికంగా వాయిదా గురించి ప్రకటించనప్పటికీ, విడుదల తేదీ మారే అవకాశం ఎక్కువగా ఉందని ఇండస్ట్రీలో ప్రచారం జరుగుతోంది. ముఖ్యంగా ‘12 ఏ రైల్వే కాలనీ’ ఫలితం ఆశించిన విధంగా రాకపోవడంతో కొంత గ్యాప్ ఇవ్వాలని అల్లరి నరేష్ భావిస్తున్నాడని సమాచారం. ఒకప్పుడు కామెడీకి సింబల్‌గా నిలిచిన, తక్కువ సమయంలో 50 సినిమాలు పూర్తి చేసిన అల్లరి నరేష్ ఇలాంటి దశలో ఉండటం అభిమానులను బాధిస్తోంది. సపోర్టింగ్ రోల్స్ చేస్తే ఇమేజ్ దెబ్బతింటుందని భావించి, తన ఎంపికల్లో చాలా జాగ్రత్తగా వ్యవహరిస్తున్నాడు.

మరి ‘ఆల్కహాల్’ జనవరి 1న రిలీజ్ అవుతుందా, లేక కొత్త తేదీని నిర్ణయిస్తారా అనేది చూడాలి.