'బైకర్' చిత్రంపై అక్కినేని నాగార్జున ప్రశంసలు ....

శర్వానంద్ హీరోగా, సీనియర్ నటుడు రాజశేఖర్ కీలక పాత్రలో నటించిన చిత్రం ‘బైకర్’పై అగ్ర నటుడు అక్కినేని నాగార్జున ప్రశంసలు కురిపించారు. ఏప్రిల్ 3న విడుదలై మంచి టాక్‌తో ప్రదర్శితమవుతున్న ఈ సినిమాను వీక్షించిన నాగార్జున, తన అభిప్రాయాన్ని సోషల్ మీడియా ద్వారా పంచుకున్నారు.

“కుటుంబ భావోద్వేగాలు, బంధాలను ‘బైకర్’ చిత్రం ఎంతో అందంగా సెలబ్రేట్ చేసింది. ముఖ్యంగా రేసింగ్ సన్నివేశాలు, క్లైమాక్స్ తప్పక చూడాల్సినవి. సాంకేతికంగా కూడా ఈ సినిమా చాలా ఉన్నత స్థాయిలో ఉంది” అని నాగార్జున పేర్కొన్నారు. దర్శకుడు అభిలాష్ రెడ్డి కంకరపై ప్రత్యేకంగా ప్రశంసలు వ్యక్తం చేస్తూ, “అభిలాష్ మా అన్నపూర్ణ కాలేజ్ ఆఫ్ ఫిల్మ్ అండ్ మీడియా విద్యార్థి కావడం నాకు గర్వంగా ఉంది. ఈ కథను ఇంత పరిణతితో తెరకెక్కించినందుకు దర్శకుడు మరియు చిత్ర బృందానికి నా అభినందనలు” అని తెలిపారు. స్టార్ హీరో నుంచి ఈ స్థాయిలో ప్రశంసలు రావడంతో చిత్ర యూనిట్ ఆనందం వ్యక్తం చేస్తోంది.