రోజుల తరబడి నటించగల మహానటులు ఇంకా పుట్టలేదు… బిగ్ బాస్ నాకు ఎంతో ఇచ్చాడు – ఇమ్మాన్యుల్

బిగ్ బాస్ నుంచి తాను ఎంతో నేర్చుకున్నానని ప్రముఖ నటుడు ఇమ్మాన్యుల్ అన్నారు. ‘జబర్దస్త్’ షో ద్వారా కోట్లాది మంది అభిమానులను సంపాదించిన ఆయన, బిగ్ బాస్‌లో కూడా తనదైన శైలిలో ప్రేక్షకులను ఆకట్టుకుని టాప్ 4 ఫైనలిస్ట్‌గా నిలిచారు. ఈ సందర్భంగా మీడియాతో మాట్లాడుతూ, బిగ్ బాస్ అనుభవాన్ని తాను ఎప్పటికీ గుండెల్లో పెట్టుకుంటానని చెప్పారు. షోలో తనతో పాల్గొన్న సహ పార్టిసిపెంట్స్‌తో ఏర్పడిన అనుబంధాన్ని ప్రత్యేకంగా గుర్తు చేసుకున్న ఆయన, ముఖ్యంగా సంజనాతో తనకు ఏర్పడిన ప్రత్యేక బంధం జీవితాంతం కొనసాగుతుందని తెలిపారు.

బిగ్ బాస్‌లో అందరూ నటిస్తారని కొందరు అనుకుంటారని, కానీ గంటల తరబడి, వారాల తరబడి, రోజుల తరబడి నటించడం ఎవరికీ సాధ్యం కాదని ఇమ్మాన్యుల్ స్పష్టం చేశారు. తన బిగ్ బాస్ ప్రయాణంలో తనకు అండగా నిలిచిన ప్రతి ఒక్కరికీ కృతజ్ఞతలు తెలిపారు. ముఖ్యంగా “విజనరీ వౌస్”కు ప్రత్యేక ధన్యవాదాలు చెప్పారు. బిగ్ బాస్ ద్వారా నేర్చుకున్న ఎన్నో విలువైన విషయాలను తన కెరీర్‌లోనూ, వ్యక్తిగత జీవితంలోనూ అమలు చేయడానికి ప్రయత్నిస్తానని వెల్లడించారు.

బిగ్ బాస్ విజేతగా నిలిచిన కల్యాణ్‌కు అభినందనలు తెలిపిన ఇమ్మాన్యుల్, తనకు మొదటి స్థానం దక్కలేదన్న అసంతృప్తి ఏమాత్రం లేదని స్పష్టంగా చెప్పారు. ఈ ప్రయాణమే తనకు గొప్ప విజయం అని పేర్కొన్నారు.