రెండు సెకన్ల వీడియోతో దేశం మొత్తం దృష్టి… ఎవరు ఈ వైరల్ ఆటో గర్ల్?

సోషల్ మీడియాలో ఏ వీడియో వైరల్ అవుతుందో ముందుగా ఊహించడం కష్టం. ఇదే నిజం మరోసారి రుజువైంది. ఆటోలో కూర్చుని కెమెరా వైపు ఒక్కసారి చూసిన యువతి రెండు సెకన్ల వీడియో ఇప్పుడు ‘ఎక్స్‌’లో లక్షల మందిని ఆకట్టుకుంటోంది. కేవలం ఒక చిన్న క్లిప్‌తో ఆమె దేశవ్యాప్తంగా చర్చనీయాంశమైంది.

నవంబర్ 2 న ‘bud wiser @w0rdgenerator’ అనే హ్యాండిల్ నుంచి ఈ వీడియో పోస్ట్ చేయబడింది. “Makeup ate today” అనే సరదా క్యాప్షన్‌తో ఆమె షేర్ చేసిన వీడియోలో తెల్లని టాప్, వెండి చెవిపోగులు ధరించి, ఆటోలో కూర్చుని కెమెరా వైపు చిరునవ్వు చిందిస్తుంది. రికార్డు రెండు సెకన్ల ఈ క్లిప్ ఇప్పటివరకు 100 మిలియన్ల (10 కోట్ల) వ్యూస్‌, వేలాది కామెంట్లు, వేలు దాటిన రీపోస్టులు, లక్షకు పైగా లైకులతో మరింత వేగంగా ట్రెండ్ అవుతోంది.

ఈ వీడియో పోస్ట్ చేసిన అమ్మాయి పేరు ప్రియాంగ. పెద్దగా ప్రసిద్ధి లేని ఆమె, ఇలా ఒక్క వీడియోతో దేశమంతా దృష్టిలో పడుతుందని ఊహించలేదు. “నాకు గరిష్టంగా వెయ్యి లైకులు వస్తాయని అనుకున్నాను. కానీ ఇది నా చేతిలో లేకుండా పోయింది. నా ముఖం వైరల్ కావడం చూసి నేనే షాక్‌కు గురయ్యాను” అని ఆమె చెప్పడం ఆసక్తికరం.

ఈ వీడియో సోషల్ మీడియాలో ఎంతగా దూసుకుపోయిందంటే… సాధారణంగా ఎక్స్‌ స్క్రోల్ చేసే వారు దాదాపు అందరూ ఈ క్లిప్‌ని చూసే ఉంటారు. ఈ రెండు సెకన్ల వీడియో ఎందుకు ఇంతగా నచ్చింది? అని ఎన్నో కామెంట్లు వస్తున్నాయి. ఈ నెల మా అమ్మానాన్నల కంటే ఈ అమ్మాయినే ఎక్కువసార్లు చూశాం అని కొందరు సరదాగా అంటున్నారు. ఎక్స్‌ సర్వర్లు కొంతసేపు డౌన్ అయినా ఈ వీడియో మాత్రం ప్లే అయ్యింది అని మరొకరు సెటైర్ వేశారు.

ఇప్పటికే ఈ వీడియో మీమ్ టెంప్లేట్‌గా మారిపోయింది. రీచ్ పెంచుకోవడానికి క్రియేటర్లు దీనిని డిజిటల్ బ్యాక్‌డ్రాప్‌లా వాడడం మొదలుపెట్టారు. ఈ వైరల్ ప్రభావంతో ప్రియాంగ అకౌంట్‌కు బ్లూ టిక్  కూడా వచ్చేసింది. దీనిపై కూడా నెటిజన్లు హాస్యాస్పద కామెంట్లు చేస్తున్నారు. ఈ వీడియో వల్ల వచ్చే డబ్బుతో భారత రూపాయి బలపడుతుంది అని ఒకరు సరదాగా వ్యాఖ్యానించారు.