నిశ్శబ్దంగా థియేటర్లకు వచ్చిన రివాల్వర్ రీటా- ఆశ్చర్యపరిచిన ఓపెనింగ్స్!

కీర్తి సురేష్ హీరోయిన్‌గా నటించిన డార్క్ కామెడీ థ్రిల్లర్ ‘రివాల్వర్ రీటా’ శుక్రవారం తెలుగులో విడుదలైంది. కానీ సాధారణ ప్రేక్షకులకు సినిమా రిలీజ్ అయిన విషయమే తెలియలేదు. రాధిక, సునీల్ వంటి పరిచిత ముఖాలు ఉన్నా, కీర్తి హైదరాబాద్ వచ్చి ప్రమోషన్లు చేసినా బజ్ లేదు. హైదరాబాద్‌లో కొన్ని షోలు మినహా చాలా చోట్ల ఆక్యుపెన్సీ సున్నా.

కథ సింపుల్: తల్లీకూతుళ్లు పొరపాటున డాన్‌ను చంపి శవాన్ని దాచే ప్రయత్నంలో చిక్కులు. ‘కోకో కోకిలా’, ‘కీడా కోలా’ ఫ్లేవర్ ఉన్నా కొత్తదనం లేదు, స్క్రీన్‌ప్లే రిపిటిటివ్‌గా సాగి బోర్ కొట్టించింది.

జాతీయ అవార్డు గెలిచిన ‘మహానటి’ కీర్తి సురేష్‌ ఇలా బలహీన స్క్రిప్ట్‌ల్లో పడిపోవడం బాధకరమే. ‘మిస్ ఇండియా’, ‘పెంగ్విన్’, ‘గుడ్ లక్ సఖి’, ఇప్పుడు ‘రివాల్వర్ రీటా’ - హీరోయిన్ సెంట్రిక్ ప్రయత్నాలు బాక్సాఫీస్ వద్ద ఫెయిల్ అవుతున్నాయి. బాలీవుడ్‌లో ‘బేబీ జాన్’ కూడా పెద్దగా ఆదరణ లేకపోవడంతో, కీర్తికి బలమైన కథలు ఎప్పుడు దొరుకుతాయన్నదే ప్రశ్న.