యువతలో పెరుగుతున్న గుండె సమస్యలు - వైద్యులు

వైద్యులు గుండె సంబంధిత సమస్యలు అన్ని వయసుల వారిలో పెరుగుతున్నాయని హెచ్చరిస్తున్నారు. అధిక రక్తపోటు, కొలెస్ట్రాల్, రక్తనాళాల అడ్డంకులు, గుండె స్పందనలో మార్పులు వంటి సమస్యలు ఇప్పుడు వృద్ధులకే కాకుండా యువతలో, పిల్లల్లో కూడా కనిపిస్తున్నాయి. జీవనశైలిలో మార్పులు, సరైన ఆహారం తీసుకోకపోవడం, శారీరక శ్రమ లేకపోవడం, పెరుగుతున్న ఒత్తిడి ఇవన్నీ ప్రధాన కారణాలుగా నిపుణులు చెబుతున్నారు.

ఎక్కువసేపు కూర్చోవడం, వ్యాయామం చేయకపోవడం, జంక్ ఫుడ్ అధికంగా తినడం, నిద్రలేమి, మానసిక ఒత్తిడి, కోపం వంటి కారణాలు గుండెపోటు ప్రమాదాన్ని పెంచుతున్నాయి. ధూమపానం, మద్యం సేవించడం కూడా ఈ ప్రమాదాన్ని మరింత ఎక్కువ చేస్తాయి. కుటుంబంలో గుండె జబ్బుల చరిత్ర ఉన్నవారికి ఈ సమస్య వచ్చే అవకాశం ఎక్కువగా ఉంటుంది. ఇటీవలి కాలంలో యువతలో గుండెపోటు కేసులు పెరుగుతుండటం ఆందోళన కలిగిస్తోంది.

గుండెపోటుకు ముందు ఛాతీలో నొప్పి లేదా ఒత్తిడి, చేయి, మెడ, వీపులో నొప్పి, శ్వాస తీసుకోవడంలో ఇబ్బంది, అధికంగా చెమట పట్టడం, తలతిరగడం, బలహీనత, వాంతులు వంటి లక్షణాలు కనిపిస్తాయి. వీటిని నిర్లక్ష్యం చేయకుండా వెంటనే వైద్యులను సంప్రదించాలని నిపుణులు సూచిస్తున్నారు. ఆరోగ్యకరమైన జీవనశైలిని అలవర్చుకోవడం, ప్రతిరోజూ వ్యాయామం చేయడం, సమతుల్య ఆహారం తీసుకోవడం, ఒత్తిడిని తగ్గించుకోవడం, సరైన నిద్రపోవడం, క్రమం తప్పకుండా ఆరోగ్య పరీక్షలు చేయించుకోవడం ద్వారా ఈ సమస్యలను నివారించవచ్చు.

గమనిక : ఈ సమాచారం కేవలం అవగాహన కోసం మాత్రమే. వైద్య సలహాగా పరిగణించకండి. ఆహారంలో మార్పులు చేయడానికి ముందు డాక్టర్లను సంప్రదించండి.