వర్షాకాలంలో చెవులను ఇలా కాపాడుకోండి - వైద్యుల సూచన

వర్షాకాలం ప్రారంభమైనప్పుడు జలుబు, దగ్గు, జ్వరం, వైరల్ ఇన్ఫెక్షన్ల గురించి ఎక్కువగా ఆందోళన చెందుతుంటాం. అయితే ఈ సీజన్‌లో చెవుల ఆరోగ్యంపై కూడా ప్రత్యేక శ్రద్ధ అవసరం. వర్షంలో తడవడం, చెవుల్లో నీరు చేరడం, తేమ ఎక్కువసేపు ఉండటం వల్ల చెవి ఇన్ఫెక్షన్ల ముప్పు పెరగవచ్చు. ఆకాష్ హెల్త్‌కేర్ సూపర్ స్పెషాలిటీ హాస్పిటల్ ఈఎన్‌టీ విభాగం సీనియర్ కన్సల్టెంట్ డాక్టర్ అభినీత్ కుమార్ ప్రకారం, చెవిలో నీరు ఎక్కువసేపు నిలిచిపోతే ఇన్ఫెక్షన్ వచ్చే అవకాశం పెరుగుతుంది. ఈత తర్వాత చెవుల్లో నీరు మిగిలిపోవడం, తడి ఇయర్‌ఫోన్స్ లేదా ఇయర్‌బడ్స్ వాడటం, అలర్జీలు, సైనస్ సమస్యలు, రోగనిరోధక శక్తి తక్కువగా ఉండటం వంటి కారణాలు కూడా సమస్యను పెంచవచ్చు.

చెవిలో నిరంతర నొప్పి, దురద, నీరు లేదా పసుపు రంగు ద్రవం కారడం, వినికిడి తగ్గడం, వాపు, అసౌకర్యం వంటి లక్షణాలను నిర్లక్ష్యం చేయకూడదు. పిల్లల్లో చిరాకు లేదా తరచూ చెవిని పట్టుకోవడం కూడా సమస్యకు సంకేతం కావచ్చు. అయితే ప్రతి చెవి నొప్పి ఇన్ఫెక్షన్ వల్లే వస్తుందని చెప్పలేం. చెవిలో గులిమి పేరుకుపోవడం, గొంతు ఇన్ఫెక్షన్, సైనస్ సమస్యలు, దవడకు సంబంధించిన సమస్యల వల్ల కూడా చెవి నొప్పి రావచ్చు. లక్షణాలు రెండు మూడు రోజులకు మించి కొనసాగితే సొంతంగా మందులు లేదా చెవి చుక్కలు వాడకుండా ఈఎన్‌టీ నిపుణుడిని సంప్రదించడం మంచిది.

వర్షంలో తడిసిన తర్వాత చెవుల బయటి భాగాన్ని మెత్తని వస్త్రంతో మెల్లగా తుడిచి ఆరబెట్టుకోవాలి. ఈత కొట్టేటప్పుడు చెవుల్లోకి నీరు వెళ్లకుండా జాగ్రత్తలు తీసుకోవాలి. తడిగా లేదా సరిగ్గా శుభ్రం చేయని ఇయర్‌ఫోన్స్, ఇయర్‌బడ్స్‌ను ఉపయోగించకపోవడం మంచిది. చెవిలో సహజంగా ఏర్పడే గులిమిని పూర్తిగా తొలగించాల్సిన అవసరం లేదు. చెవులను అతిగా శుభ్రం చేయడం వల్ల లోపలి చర్మం దెబ్బతిని ఇన్ఫెక్షన్ ముప్పు పెరగవచ్చు. చెవిలో పిన్నులు, పుల్లలు వంటి పదునైన వస్తువులను పెట్టకూడదు. వైద్యుల సలహా లేకుండా చెవిలో నూనె లేదా ఇతర ద్రవాలను పోయకూడదు. నొప్పి, ద్రవం కారడం లేదా వినికిడి తగ్గడం వంటి సమస్యలు ఉంటే వైద్యుడిని సంప్రదించడం ఉత్తమం.

గమనిక: ఈ సమాచారం సాధారణ అవగాహన కోసం మాత్రమే. దీనికి మేము ఎలాంటి బాధ్యత వహించము. ఆరోగ్యంపై ఏవైనా సందేహాలు లేదా సమస్యలు ఉంటే వైద్యులను సంప్రదించి, వారి సూచనలను పాటించండి.