గాఢ నిద్ర కోసం లావెండర్ నూనె ఉపయోగమా? నిపుణుల అభిప్రాయం

ఈ రోజుల్లో నిద్రలేకపోవడం అనేది సాధారణ సమస్యగా మారింది. ప్రతి పది మందిలో కనీసం ఐదుగురు ఈ సమస్యతో బాధపడుతున్నారని చెబుతున్నారు. మారిన జీవనశైలి, ఒత్తిడి, అనియంత్రిత అలవాట్లు ఇందుకు ప్రధాన కారణాలు. సరైన నిద్ర లేకపోతే శరీర రోగనిరోధక శక్తి తగ్గి, అనేక వ్యాధులకు గురయ్యే ప్రమాదం పెరుగుతుంది. మీరు కూడా రాత్రిళ్లు నిద్రలేమితో ఇబ్బంది పడుతుంటే, కొన్ని సరళమైన చిట్కాలను క్రమం తప్పకుండా పాటించడం ద్వారా ఈ సమస్యను తగ్గించుకోవచ్చు.

చాలామంది ఎక్కువగా పని చేసి అలసిపోతే నిద్ర త్వరగా వస్తుందని భావిస్తారు. కానీ కొన్ని సందర్భాల్లో శరీరం ఎంత అలసిపోయినా నిద్ర పట్టకపోవచ్చు. నిద్ర రావడానికి శరీరం సరైన సమయంలో సంకేతాలు ఇవ్వాలి. అందుకే నిద్రకు ముందు శ్వాస వ్యాయామం చేయడం ఉపయుక్తం. బెడ్‌పై పడుకుని నాలుగు సెకన్ల పాటు లోతుగా శ్వాస తీసుకుని, ఏడుసెకన్ల పాటు ఆ శ్వాసను ఆపి, తర్వాత ఎనిమిది సెకన్ల పాటు నెమ్మదిగా వదలాలి. ఈ ప్రక్రియను కొన్ని సార్లు పునరావృతం చేస్తే శరీరం రిలాక్స్ అవుతూ నిద్ర సులభంగా పడుతుంది.

ఇంకా త్వరగా నిద్ర రావాలంటే పడుకునే ముందు కాళ్లకు కాటన్ సాక్స్‌లు ధరించడం మంచిదని అధ్యయనాలు సూచిస్తున్నాయి. ఇలా చేయడం వల్ల పాదాల ఉష్ణోగ్రత పెరిగి, శరీరానికి విశ్రాంతి సంకేతాలు చేరి నిద్ర త్వరగా వస్తుంది. అదనంగా లావెండర్ నూనె వాసన కూడా ఒత్తిడిని తగ్గించి మెదడును ప్రశాంతంగా ఉంచుతుంది. ఇది హార్ట్‌రేట్, రక్తపోటు వంటి అంశాలను సమతుల్యం చేయడంలో సహాయపడుతుందని పరిశోధనలు తెలియజేస్తున్నాయి. కాబట్టి మంచి, గాఢ నిద్ర కోసం ఈ చిట్కాలను పాటించడం ప్రయోజనకరం.

గమనిక: ఇక్కడ ఇచ్చిన సమాచారం కేవలం అవగాహన కోసం మాత్రమే. దీనికి మేము ఎలాంటి బాధ్యత వహించము. ఏవైనా ఆరోగ్య సమస్యలు ఉంటే తప్పనిసరిగా వైద్యుడిని లేదా న్యూట్రిషనిస్ట్‌ను సంప్రదించి వారి సలహా మేరకు అనుసరించండి.