వైద్యులు సూచించిన విధంగా.. ఇంట్లోనే రుచికరమైన కొబ్బరి జున్ను ఇలా తయారు చేసుకోండి!

కొబ్బరితో ఎన్నో రకాల వంటకాలను తయారు చేసుకోవచ్చు. అలాంటి వాటిలో కొబ్బరి జున్ను కూడా ఒకటి. తక్కువ పదార్థాలతో, సులభమైన పద్ధతిలో ఇంట్లోనే ఈ రుచికరమైన స్వీట్‌ను తయారు చేసుకోవచ్చు. ఇందుకోసం రెండు కప్పుల పచ్చి కొబ్బరి ముక్కలు, రెండు కప్పుల నీళ్లు, అర కప్పు చక్కెర, నాలుగు టేబుల్ స్పూన్ల మొక్కజొన్న పిండి, అర టీ స్పూన్ యాలకుల పొడి అవసరమవుతాయి. ముందుగా కొబ్బరి ముక్కలను మిక్సీలో వేసి నీళ్లు పోయకుండా మెత్తగా గ్రైండ్ చేయాలి. ఆ తర్వాత రెండు కప్పుల నీళ్లు జోడించి మరోసారి మెత్తగా గ్రైండ్ చేయాలి. ఈ మిశ్రమాన్ని పలుచని వస్త్రం లేదా జల్లెడతో వడకట్టి కొబ్బరి పాలను సేకరించాలి. అనంతరం కొద్దిగా కొబ్బరి పాలలో మొక్కజొన్న పిండిని వేసి ఉండలు లేకుండా కలిపి పక్కన పెట్టుకోవాలి.

తర్వాత మిగిలిన కొబ్బరి పాలను ఒక గిన్నెలోకి తీసుకుని స్టవ్‌పై పెట్టాలి. అందులో చక్కెర వేసి కలుపుతూ, ముందుగా సిద్ధం చేసుకున్న మొక్కజొన్న పిండి మిశ్రమాన్ని జోడించాలి. మిశ్రమం చిక్కబడే వరకు తక్కువ మంటపై నిరంతరం కలుపుతూ ఉడికించాలి. సుమారు నాలుగు నుంచి ఐదు నిమిషాల్లో మిశ్రమం చిక్కగా మారుతుంది. ఈ సమయంలో కావాలనుకుంటే యాలకుల పొడిని కలుపుకోవచ్చు. అనంతరం స్టవ్ ఆఫ్ చేసి, మిశ్రమాన్ని ఒక గిన్నెలోకి తీసుకుని పూర్తిగా చల్లారనివ్వాలి. ఆ తర్వాత ఫ్రిజ్‌లో గంటన్నర నుంచి రెండు గంటల పాటు ఉంచాలి. బాగా చల్లబడిన తర్వాత గిన్నె నుంచి ప్లేట్‌లోకి తీసి ముక్కలుగా కట్ చేసుకోవాలి. పుదీనా ఆకులు లేదా డ్రై ఫ్రూట్స్‌తో అలంకరించి వడ్డించవచ్చు. ఇలా సులభంగా ఇంట్లోనే రుచికరమైన కొబ్బరి జున్నును తయారు చేసుకోవచ్చు.