పార్కింగ్ మూవీ డైరెక్టర్ కథకు శివకార్తికేయన్ గ్రీన్ సిగ్నల్ ఇస్తారా?

సినిమా రంగం నిజంగా ఒక మాయాజాలం. ఇక్కడ ఎవరు ఎప్పుడు పాపులర్ అవుతారో, ఎవరు ఎవరి తో కలిసి సినిమా చేస్తారో ముందుగా చెప్పడం కష్టం. రజనీకాంత్ 173 వ సినిమాకు దర్శకుడు ఎవరు అనే విషయంలో పెద్ద చర్చ జరిగింది. ధనుష్ సహా పలువురు దర్శకుల పేర్లు సోషల్ మీడియాలో వినిపించాయి. చివరకు అనూహ్యంగా సుందర్ సి పేరు ఖరారైంది. దీనికి సంబంధించిన అధికారిక ప్రకటన కూడా వెలువడింది. కానీ హఠాత్తుగా సుందర్ సి ఆ ప్రాజెక్ట్ నుంచి తప్పుకున్నారు.

ఆ తరువాత పార్కింగ్ సినిమా ఫేమ్ రామ్‌కుమార్ బాలకృష్ణన్ పేరు ముందుకొచ్చింది. ఇది లక్కీ ఛాన్స్ అని అందరూ భావించారు. అదే సమయంలో డ్రాగన్ సినిమా ఫేమ్ అశ్వద్ మారిముత్తు పేరు కూడా వినిపించింది. అయితే తాజాగా డాన్ సినిమా దర్శకుడు సిబి చక్రవర్తి పేరు ఖరారైంది.

ఇక పార్కింగ్ దర్శకుడు రామ్‌కుమార్ బాలకృష్ణన్ ప్రస్తుతం ఏం చేస్తున్నారంటే, ఆయన ఇటీవల శివకార్తికేయన్‌కు ఒక కథ వినిపించినట్లు సమాచారం. ఆ కథకు శివకార్తికేయన్ గ్రీన్ సిగ్నల్ ఇస్తారా లేదా అన్నది ఇప్పుడు ఆసక్తిగా మారింది. శివకార్తికేయన్ నటించిన పరాశక్తి సినిమా ఈ నెల 10 న విడుదల కానుంది. ఆ తరువాత వెంకట్ ప్రభు దర్శకత్వంలో నటించేందుకు సిద్ధమవుతున్నారు. ఒకవేళ రామ్‌కుమార్ కథకు ఓకే చెప్తే, వెంకట్ ప్రభు సినిమాకి తరువాతే ఈ ప్రాజెక్ట్ వచ్చే అవకాశం ఉంది.