రామ్ చరణ్ ‘పెద్ది’ విడుదల పై డైలామా..

రామ్ చరణ్ నటిస్తున్న ‘పెద్ది’ సినిమా ఇప్పటికే ఒకసారి వాయిదా పడింది. ఇప్పుడు మళ్లీ రిలీజ్ పై అనుమానాలు పెరుగుతున్నాయి. ఈ నెల 30న థియేటర్లలోకి రావాల్సి ఉన్న ఈ సినిమా, సమయానికి వస్తుందా లేదా అన్నది ఇంకా స్పష్టత లేదు. ఇటీవల ఒక సినిమా ప్రమోషన్లలో చరణ్ స్వయంగా ‘పెద్ది’ టైంకి వస్తుందని చెప్పాడు. కానీ హనుమాన్ జయంతి సందర్భంగా విడుదల చేసిన పోస్టర్‌లో రిలీజ్ తేదీ లేకపోవడంతో అభిమానుల్లో కొత్త సందేహాలు మొదలయ్యాయి.

ప్రస్తుతం వస్తున్న సమాచారం ప్రకారం ఈ సినిమా మరోసారి వాయిదా పడే అవకాశం ఎక్కువగా కనిపిస్తోంది. జూన్ నెలలో మొదటి వారం లేదా చివరి వారంలో విడుదల చేయాలని భావిస్తున్నారని టాక్. ఈ విషయంపై అధికారిక ప్రకటన త్వరలోనే వచ్చే అవకాశం ఉంది. ఆలస్యానికి ప్రధాన కారణం షూటింగ్ ఇంకా పూర్తికాకపోవడమే. ఒక పాట షూటింగ్‌తో పాటు రీ రికార్డింగ్ పనులు ఇంకా పెండింగ్‌లో ఉన్నాయి.

పాన్ ఇండియా సినిమా కావడంతో దేశవ్యాప్తంగా పెద్ద స్థాయిలో ప్రమోషన్లు చేయాలి. చేతిలో తక్కువ సమయం ఉండటంతో అన్ని పనులు పూర్తి చేసి ఈ నెల 30న విడుదల చేయడం కష్టంగా మారింది. అందుకే జూన్ 4 లేదా జూన్ 25 తేదీలకు వాయిదా పడొచ్చని ప్రచారం జరుగుతోంది. స్పోర్ట్స్ డ్రామాగా తెరకెక్కిన ఈ చిత్రంలో జాన్వీ కపూర్ హీరోయిన్‌గా నటిస్తోంది. శివరాజ్ కుమార్, జగపతిబాబు, దివ్యేందు కీలక పాత్రల్లో కనిపించనున్నారు. ఏఆర్ రెహమాన్ సంగీతం అందించగా, ఇప్పటికే విడుదలైన పాటలు మంచి స్పందన పొందాయి. ఈ చిత్రానికి బుచ్చిబాబు దర్శకత్వం వహిస్తున్నారు.