రామాయణలో సాయి పల్లవి పాత్రపై వివాదమేంటి?

నితీష్ తివారీ తెరకెక్కిస్తున్న ‘రామాయణం’ చిత్రానికి సంబంధించిన ప్రచార చిత్రాలు సామాజిక మాధ్యమాల్లో చర్చకు దారితీస్తున్నాయి. సీత పాత్రలో నటిస్తున్న సాయిపల్లవి యోధురాలిగా రాక్షసులతో పోరాడటం, పిల్లలకు శిక్షణ ఇవ్వడం వంటి దృశ్యాలు వైరల్ అవుతున్నాయి. వాల్మీకి రామాయణంలో సీతాదేవిని ఈ విధంగా చూపించలేదని కొందరు అభ్యంతరం వ్యక్తం చేస్తున్నారు. సంప్రదాయ కథకు భిన్నంగా పాత్రను చిత్రీకరించడం వల్ల మతపరమైన మనోభావాలు దెబ్బతినే అవకాశం ఉందని విమర్శిస్తున్నారు. అంతర్జాతీయ ప్రేక్షకులను ఆకట్టుకునే ప్రయత్నంలో భాగంగానే ఇలాంటి మార్పులు చేశారనే అభిప్రాయాలు కూడా వినిపిస్తున్నాయి.

మరోవైపు, ‘అద్భుత రామాయణం’ వంటి ఇతర గ్రంథాల్లో సీతాదేవి శక్తిమంతమైన రూపంలో కనిపిస్తారని కొందరు ఈ చిత్రానికి మద్దతుగా నిలుస్తున్నారు. దీంతో సినిమాలో సీత పాత్రను ఎలా ఆవిష్కరించారనే అంశంపై ఆసక్తి పెరుగుతోంది. రణ్‌బీర్ కపూర్ కథానాయకుడిగా నటిస్తున్న ఈ భారీ చిత్రంపై ఇప్పటికే భారీ అంచనాలు నెలకొన్నాయి. సామాజిక మాధ్యమాల్లో జరుగుతున్న చర్చలతో సినిమాపై మరింత దృష్టి పడుతోంది. అయితే ప్రచార చిత్రాల ఆధారంగా తుది నిర్ణయానికి రావడం సరికాదని అభిమానులు అభిప్రాయపడుతున్నారు. విడుదలైన తర్వాతే పూర్తి కథనం, పాత్రల చిత్రణపై స్పష్టత రానుంది.