టాక్ ఆఫ్ ది టౌన్: వర్మతో నాగార్జున మరోసారి జట్టు కట్టబోతున్నారా?

‘శివ’ రీ-రిలీజ్ సందర్భంగా భారీ ప్రమోషన్ కార్యక్రమాలు జరుగుతున్నాయి. ఈ సందర్భంలో నాగార్జున తన పరిచయాలన్నీ తిరిగి వెలుగులోకి తెచ్చారు. చిరంజీవి, అల్లు అర్జున్‌లాంటి స్టార్ హీరోలతో మాట్లాడారు. తాజాగా రామ్ గోపాల్ వర్మతో కలిసి మీడియా సమావేశం కూడా నిర్వహించారు.

ఈ సమావేశంలో నాగార్జున మరియు వర్మ మధ్య ఆసక్తికర చర్చ జరిగింది. ‘శివ’ సినిమా సమయంలో వర్మపై పూర్తిగా నమ్మకం ఉంచి సెట్స్‌పైకి వెళ్లిన నాగార్జున — ఇప్పుడు కూడా ఆ నమ్మకం అలాగే ఉందా? అనే ప్రశ్నకు నాగ్ వెంటనే సమాధానమిచ్చారు.

రామ్ గోపాల్ వర్మపై ఇప్పటికీ అదే నమ్మకం ఉందని, అన్నీ సవ్యంగా జరిగితే ఖచ్చితంగా మళ్లీ సినిమా చేస్తానని తెలిపారు నాగార్జున.

అయితే వర్మ మాత్రం ఈ ప్రతిపాదనను సున్నితంగా తిరస్కరించాడు. “ఇప్పుడే నాగార్జునతో సినిమా చేయను. ముందు ఓ హిట్ ఇవ్వాలి. నా మీద నాకు నమ్మకం పెరిగిన తర్వాతే నాగార్జునను సంప్రదిస్తాను”, అని స్పష్టంగా తెలిపారు.

నాగార్జున తనపై నమ్మకం ఉంచినా, ప్రస్తుతం తాను హిట్ సినిమా తీస్తానన్న నమ్మకం లేనందున కొంత సమయం తీసుకుంటానని వర్మ వెల్లడించారు.

ఇప్పుడు అభిమానుల మధ్య చర్చ మొదలైంది — “వర్మ-నాగ్ కాంబో మళ్లీ వస్తుందా?” అని.