డిజిటల్ రిలీజ్‌కు ముందే థియేటర్లలో 'రామాయణ' 3D ట్రైలర్?

ఢిల్లీలోని భారత్ మండపంలో నిర్వహించిన 'రామాయణ' మీడియా, సెలబ్రిటీ ప్రివ్యూతో ఈ చిత్రంపై భారీ అంచనాలు నెలకొన్నాయి. ప్రివ్యూకు హాజరైన వారు సినిమా విజువల్ గ్రాండియర్‌ను ప్రశంసించగా, ముఖ్యంగా యశ్ రావణ పాత్ర 3D ట్రైలర్‌లో హైలైట్‌గా నిలిచిందని అభిప్రాయపడ్డారు. ఈ ట్రైలర్ జూలై 24, 2026న డిజిటల్‌గా విడుదల కానుండగా, అంతకుముందే దేశంలోని ఎంపిక చేసిన 3D మరియు IMAX థియేటర్లలో ప్రదర్శించే అవకాశమున్నట్లు సినీ వర్గాల్లో చర్చ జరుగుతోంది.

ఈ ఊహాగానాలకు మరింత బలం చేకూర్చుతూ సీబీఎఫ్‌సీ ప్రత్యేకంగా "థియేట్రికల్ ట్రైలర్ – రామాయణ 3D" పేరుతో నాలుగు నిమిషాల ట్రైలర్‌కు సర్టిఫికేషన్ ఇచ్చినట్లు సమాచారం. నితేష్ తివారి దర్శకత్వంలో రూపొందుతున్న ఈ చిత్రంలో రణబీర్ కపూర్, సాయి పల్లవి, యశ్, సన్నీ డియోల్, రకుల్ ప్రీత్ సింగ్, కాజల్ అగర్వాల్, రవి దూబే, కునాల్ కపూర్ కీలక పాత్రల్లో నటిస్తున్నారు. ప్రైమ్ ఫోకస్ స్టూడియోస్, మాన్‌స్టర్ మైండ్ క్రియేషన్స్ నిర్మిస్తున్న ఈ చిత్రానికి ఆస్కార్ విజేత VFX సంస్థ DNEG విజువల్ ఎఫెక్ట్స్ అందిస్తోంది. IMAX ఫార్మాట్‌ను దృష్టిలో ఉంచుకుని తెరకెక్కించిన తొలి భారతీయ చిత్రంగా ప్రచారం పొందుతున్న ఈ సినిమా తొలి భాగం దీపావళికి థియేటర్లలో విడుదల కానుంది.