ఎన్టీఆర్‌–ప్రశాంత్‌ నీల్‌ మూవీలో భారీ స్పెషల్‌ సాంగ్‌?

ఎన్టీఆర్‌, దర్శకుడు ప్రశాంత్‌ నీల్‌ కలయికలో తెరకెక్కుతున్న సినిమాపై రోజురోజుకూ అంచనాలు పెరుగుతున్నాయి. ప్రస్తుతం ‘డ్రాగన్‌’ లేదా ‘బ్రూస్‌ లీ’ అనే వర్కింగ్‌ టైటిల్స్‌తో ప్రచారంలో ఉన్న ఈ సినిమాకు సంబంధించి తాజాగా ఓ క్రేజీ అప్‌డేట్‌ వినిపిస్తోంది. మూవీ కోసం ఓ భారీ స్పెషల్‌ సాంగ్‌ను చిత్రీకరించేందుకు మేకర్స్‌ ప్లాన్‌ చేస్తున్నట్లు సమాచారం. ఇందుకోసం భారీ సెట్‌ను నిర్మిస్తున్నట్లు తెలుస్తోంది. భారీ స్థాయిలో రూపొందించనున్న ఈ పాటలో విజువల్స్‌ అద్భుతంగా ఉండనున్నాయని టాక్‌. ఎన్టీఆర్‌, రుక్మిణీ వసంత్‌తో పాటు మరో హీరోయిన్‌ కూడా ఈ సాంగ్‌లో స్టెప్పులు వేయనున్నట్లు తెలుస్తోంది.

భారీ బడ్జెట్‌తో తెరకెక్కుతున్న ఈ సినిమా మాస్‌ యాక్షన్‌ ఎంటర్‌టైనర్‌గా రూపొందుతోంది. యాక్షన్‌ సన్నివేశాలను అత్యున్నత స్థాయిలో తెరకెక్కించేందుకు ప్రశాంత్‌ నీల్‌ ప్రత్యేక శ్రద్ధ తీసుకుంటున్నట్లు సమాచారం. ఎన్టీఆర్‌ కెరీర్‌లోనే అత్యుత్తమ చిత్రాల్లో ఒకటిగా నిలిచేలా ఈ సినిమాను రూపొందించాలని ఆయన లక్ష్యంగా పెట్టుకున్నట్లు తెలుస్తోంది. అందుకే స్క్రిప్ట్‌ విషయంలోనూ ప్రశాంత్‌ నీల్‌ ఎక్కువ సమయం తీసుకున్నట్లు సమాచారం. ఇప్పటివరకు ఆయన తెరకెక్కించిన చిత్రాల్లో ఇదే అత్యుత్తమంగా నిలుస్తుందనే అంచనాలు వ్యక్తమవుతున్నాయి. ఈ చిత్రంలో అనిల్‌ కపూర్‌ కీలక పాత్రలో కనిపించనున్నారు.