‘కింగ్ 100'లో నాగార్జున ప్రయోగం.. టాలీవుడ్‌లో తొలిసారి అలాంటి ప్రయత్నం!

టాలీవుడ్ కింగ్ అక్కినేని నాగార్జున తన 100వ సినిమాతో మరోసారి వార్తల్లో నిలిచారు. ప్రస్తుతం “కింగ్ 100” అనే పేరుతో తెరకెక్కుతున్న ఈ సినిమా వేగంగా షూటింగ్ జరుపుకుంటోంది. తమిళ దర్శకుడు రా కార్తీక్ దర్శకత్వంలో రూపొందుతున్న ఈ చిత్రాన్ని నాగార్జున స్వయంగా నిర్మిస్తున్నారు. అధికారిక ప్రకటన లేకపోయినా ఈ సినిమా పై ఇప్పటికే మంచి ఆసక్తి ఏర్పడింది.

ఈ సినిమాలో నాగార్జున వినూత్నమైన ప్రయోగం చేయబోతున్నారు. ఆధునిక డీ ఏజింగ్ సాంకేతికత ద్వారా 25 ఏళ్ల యువకుడిగా నుంచి 60 ఏళ్ల వ్యక్తిగా వివిధ వయసుల్లో కనిపించనున్నారు. అలాగే తండ్రి కొడుకు పాత్రల్లో ద్విపాత్రాభినయం చేస్తున్నట్టు సమాచారం. మూడు వేర్వేరు రూపాల్లో కనిపిస్తూ జీవితంలోని విభిన్న దశలను చూపించనున్నారు. హాలీవుడ్ స్థాయిలో విజువల్స్‌తో పాటు యాక్షన్ మరియు భావోద్వేగాలకు ప్రాధాన్యం ఇచ్చిన కథగా ఈ సినిమా రూపొందుతోంది.

ఈ సినిమాలో ముఖ్య పాత్రలో టబు నటిస్తున్నారు. దాదాపు ముప్పై సంవత్సరాల తర్వాత నాగార్జున టబు జంట మళ్లీ తెరపై కనిపించనుంది. అలాగే ఐశ్వర్య రాజేష్ మరియు సుస్మితా భట్ కూడా కీలక పాత్రల్లో నటించనున్నట్లు సమాచారం. అన్నపూర్ణ స్టూడియోస్ సమర్పణలో రూపొందుతున్న ఈ సినిమాకు సంగీతాన్ని దేవిశ్రీ ప్రసాద్ అందిస్తున్నారు. ఈ చిత్రాన్ని ఈ ఏడాది దసరా సందర్భంగా విడుదల చేయాలని యోచిస్తున్నారు.