హైదరాబాద్‌లో మరిన్ని ఐమాక్స్ స్క్రీన్లు..సినీ అభిమానులకు పండగే!

హైదరాబాద్‌లో ఐమాక్స్ స్క్రీన్ కోసం సినీ ప్రియులు చాలాకాలంగా ఎదురుచూస్తున్నారు. ఈ నేపథ్యంలో మహేశ్ బాబు, ఏషియన్ సినిమాస్ కలిసి ‘ఏఎంబీ క్లాసిక్’ పేరుతో ఐమాక్స్ స్క్రీన్‌ను ప్రకటించడంతో ప్రేక్షకుల్లో కొత్త ఆశలు చిగురించాయి. తాజాగా నగరంలోని ఫైనాన్షియల్ డిస్ట్రిక్ట్ సమీపంలో మరో ఐమాక్స్ స్క్రీన్ ఏర్పాటు కానున్నట్లు వార్తలు వస్తున్నాయి. విప్రో సర్కిల్ వద్ద అపర్ణ సినిమాస్ 12 స్క్రీన్ల మల్టీప్లెక్స్‌ను అభివృద్ధి చేస్తున్నట్లు సమాచారం. ఈ మల్టీప్లెక్స్‌లోనే కొత్త ఐమాక్స్ స్క్రీన్‌ను ఏర్పాటు చేయనున్నట్లు ప్రచారం జరుగుతోంది. అయితే, దీనిపై అధికారిక ప్రకటన రావాల్సి ఉంది.

ఇటీవల హైదరాబాద్‌లో పీఎక్స్‌ఎల్, డాల్బీ సినిమా వంటి ప్రీమియం సినిమా ఫార్మాట్లు అందుబాటులోకి రావడంతో ప్రేక్షకుల్లో ఉత్సాహం పెరిగింది. ఇప్పుడు మరో ఐమాక్స్ స్క్రీన్ కూడా అందుబాటులోకి వస్తే, నగరంలో భారీ తెరపై సినిమాలను వీక్షించే అవకాశాలు మరింత పెరుగుతాయి. సినిమాలను థియేటర్లలో ఆస్వాదించడంలో ముందుండే హైదరాబాద్ ప్రేక్షకులకు ఇది శుభవార్తగా మారే అవకాశం ఉంది. అయితే, కొత్త ఐమాక్స్ స్క్రీన్ ఏర్పాటు, ప్రారంభ తేదీ, మల్టీప్లెక్స్ వివరాలపై అధికారిక స్పష్టత రావాల్సి ఉంది.