ది ప్యారడైజ్‌లో విలన్‌గా మోహన్‌బాబు.. కెరీర్‌లోనే హయ్యెస్ట్ రెమ్యునరేషన్?

తెలుగు సినిమా రంగంలో దాదాపు ఐదు దశాబ్దాలుగా తనదైన ముద్ర వేసిన నటుడు మోహన్‌బాబు. హీరోగా, విలన్‌గా, సహాయ నటుడిగా ఎన్నో గుర్తుండిపోయే పాత్రలు చేసిన ఆయన, చాలా ఏళ్ల తర్వాత మరోసారి పూర్తి స్థాయి విలన్ పాత్రలో కనిపించనున్నారు. నేచురల్ స్టార్ నాని హీరోగా, దసరా ఫేమ్ శ్రీకాంత్ ఓదెల దర్శకత్వంలో తెరకెక్కుతున్న ది ప్యారడైజ్ సినిమాలో మోహన్‌బాబు ప్రతినాయకుడిగా నటిస్తున్నారు. ఈ చిత్రాన్ని ఎస్ఎల్వీ సినిమాస్ బ్యానర్‌పై సుధాకర్ చెరుకూరి సుమారు 200 కోట్ల భారీ బడ్జెట్‌తో నిర్మిస్తున్నారు.

ఈ సినిమాలో నాని సరసన సోనాలి కులకర్ణి హీరోయిన్‌గా నటిస్తుండగా, రాఘవ్ జుయల్, బాబు మోహన్, తనికెళ్ల భరణి, సంపూర్ణేష్ బాబు కీలక పాత్రల్లో కనిపించనున్నారు. మోహన్‌బాబు పాత్ర పేరు శికంజ మాలిక్. షర్ట్ లేకుండా, గన్‌, కత్తితో రగ్గడ్ లుక్‌లో విడుదలైన ఆయన పోస్టర్ సినిమాపై అంచనాలను భారీగా పెంచింది. అనిరుధ్ సంగీతం అందిస్తుండగా, ఈ సినిమాను పాన్ ఇండియా స్థాయిలో 8 భాషల్లో విడుదల చేయాలని ప్లాన్ చేస్తున్నారు.

ఇప్పటికే వచ్చే నెల (మార్చి) 26 న విడుదల తేదీని ప్రకటించారు. అయితే అదే రోజున పవన్ కళ్యాణ్ నటించిన ఉస్తాద్ భగత్ సింగ్ కూడా విడుదలకు సిద్ధంగా ఉండటంతో రిలీజ్ డేట్‌పై సందేహాలు నెలకొన్నాయి. ఇదిలా ఉండగా, మోహన్‌బాబుకు ఈ సినిమాకు గాను 5 కోట్ల రూపాయల రెమ్యునరేషన్ ఇచ్చారనే వార్తలు సోషల్ మీడియాలో వైరల్ అవుతున్నాయి. ఇది ఆయన కెరీర్‌లోనే అత్యధిక పారితోషికమని ప్రచారం జరుగుతోంది. ఈ వార్తల్లో నిజం ఎంత ఉందో అధికారిక ప్రకటన వచ్చే వరకు వేచి చూడాల్సిందే.