విజయ్ బర్త్‌డే కానుకగా ‘జన నాయకన్’ రిలీజ్?

తమిళనాడు ముఖ్యమంత్రిగా రాజకీయ బాధ్యతలు నిర్వర్తిస్తున్న దళపతి విజయ్ అభిమానులు ప్రస్తుతం ఆయన చివరి చిత్రం ‘జన నాయగన్’ కోసం ఆసక్తిగా ఎదురుచూస్తున్నారు. తాజాగా జొమాటోకు చెందిన డిస్ట్రిక్ట్ టికెటింగ్ యాప్ వినియోగదారులకు జూన్ 19, 2026న ఈ చిత్రం తమిళం, తెలుగులో విడుదల కానుందని నోటిఫికేషన్లు రావడంతో సోషల్ మీడియాలో భారీ చర్చ మొదలైంది. అయితే, చిత్ర బృందం నుంచి ఇప్పటివరకు అధికారిక ప్రకటన వెలువడలేదు.

ఈ విడుదల తేదీ నిజమైతే విజయ్ పుట్టినరోజు సందర్భంగా అభిమానులకు ఇది భారీ కానుకగా మారనుంది. హెచ్ వినోద్ దర్శకత్వం వహిస్తున్న ఈ రాజకీయ డ్రామాలో పూజా హెగ్డే, మమితా బైజు కీలక పాత్రలు పోషిస్తున్నారు. కేవీఎన్ ప్రొడక్షన్స్ నిర్మిస్తున్న ఈ చిత్రానికి అనిరుధ్ రవిచందర్ సంగీతం అందిస్తున్నారు. ఆన్‌లైన్ లీక్స్ వంటి సమస్యలు ఎదురైనా సినిమాపై అంచనాలు మాత్రం రోజురోజుకీ పెరుగుతున్నాయి.