'కాకా'లో ఆ పాత్రే హైలైట్‌ ?

మెగాస్టార్‌ చిరంజీవి, దర్శకుడు బాబీ కాంబినేషన్‌లో తెరకెక్కుతున్న ‘కాకా’ సినిమాపై అంచనాలు రోజురోజుకూ పెరుగుతున్నాయి. ఈ చిత్రంలో చిరంజీవి డ్యూయల్‌ రోల్‌లో కనిపించనున్నారనే వార్తలు ఇప్పటికే మెగా అభిమానుల్లో ఆసక్తిని పెంచాయి. తాజా గాసిప్‌ ప్రకారం, రెండు పాత్రల్లో మిడిల్‌ ఏజ్‌ ‘కాకా’ పాత్రకే ఎక్కువ ప్రాధాన్యత ఉండనుందట. టీనేజ్‌ అమ్మాయికి తండ్రిగా, సమాజం పట్ల బాధ్యత కలిగిన వ్యక్తిగా కనిపించే ఈ పాత్రలో కామెడీ, ఎమోషన్‌, యాక్షన్‌ అంశాలు సమపాళ్లలో ఉండనున్నట్లు టాక్‌.

ఇక మరో పాత్రలో చిరంజీవి యంగ్‌ లుక్‌లో కనిపించనున్నారు. రెండు విభిన్నమైన పాత్రల్లో మెగాస్టార్‌ను చూడటం అభిమానులకు డబుల్‌ ధమాకా కానుందని సినీ వర్గాల్లో చర్చ జరుగుతోంది. ముఖ్యంగా మిడిల్‌ ఏజ్‌ పాత్రే కథలో కీలకంగా నిలుస్తుందని, ఈ పాత్రలో చిరంజీవి కామెడీ, భావోద్వేగాలతో పాటు మాస్‌ యాక్షన్‌తోనూ ఆకట్టుకోనున్నారని ప్రచారం సాగుతోంది. 2027 సంక్రాంతి కానుకగా ‘కాకా’ను ప్రేక్షకుల ముందుకు తీసుకురావాలని మేకర్స్‌ సన్నాహాలు చేస్తున్నట్లు సమాచారం.