కాంత సినిమా వెనక నిజ కథనా? దుల్కర్ సల్మాన్ పాత్ర అసలు ఎవరిదో తెలుసా!

మలయాళ నటుడు దుల్కర్ సల్మాన్ ఇప్పుడు పాన్ ఇండియా స్థాయిలో విశేష గుర్తింపు పొందాడు. మహానటి, సీతారామం, లక్కీ భాస్కర్ వంటి చిత్రాలతో తెలుగు ప్రేక్షకుల మనసుల్లో ప్రత్యేక స్థానాన్ని సంపాదించాడు. ఇప్పుడు ఆయన నటించిన తాజా చిత్రం ‘కాంత’ (Kaantha) తమిళం, తెలుగు భాషల్లో ఒకేసారి విడుదల కానుంది.

ఈ సినిమా టీజర్, ట్రైలర్ చూసిన ప్రేక్షకుల్లో ఇది కూడా మరో క్లాసిక్ మూవీ అవుతుందనే అంచనాలు మొదలయ్యాయి. మణిరత్నం దర్శకత్వం వహించిన ఇద్దరు సినిమాను గుర్తుకు తెస్తున్నట్లు ప్రోమోలు కనిపిస్తున్నాయి.

చాలామందికి తెలియని విషయం ఏమిటంటే, ‘కాంత’ కూడా ఒక బయోపిక్. దర్శకుడు సెల్వమణి సెల్వరాజ్ ఈ సినిమాను ఒక లెజెండరీ తమిళ నటుడు ఎంకే త్యాగరాజన్ (M.K. Thyagarajan) జీవితం ఆధారంగా తీర్చిదిద్దినట్లు సమాచారం.

ఎంకేటీ 1910లో పేద కుటుంబంలో జన్మించారు. స్టేజ్ సింగర్‌గా పేరు తెచ్చుకున్న ఆయన తర్వాత సినిమాల్లోకి వచ్చి సూపర్‌స్టార్‌గా ఎదిగారు. ఆయన నటించిన హరిదాస్ సినిమా 100 వారాల పాటు నడిచింది. 1940లలోనే మెర్సిడెస్ బెంజ్‌లో తిరిగి, బంగారు పళ్లెంలో భోజనం చేసేంత స్థాయికి ఎదిగారు.

అయితే 1944లో ఒక హత్య కేసులో చిక్కుకోవడం ఆయన కెరీర్‌ను పూర్తిగా దెబ్బతీసింది. రెండు సంవత్సరాల జైలు శిక్ష అనంతరం నిర్దోషిగా విడుదలైనప్పటికీ, ప్రజలు తిరిగి అంగీకరించలేదు. చివరికి సంపాదించిన ఆస్తి మొత్తం కోల్పోయి, ఆరోగ్యం క్షీణించి 1959లో 49 ఏళ్ల వయసులో మరణించారు.

‘కాంత’ సినిమాలో దుల్కర్ సల్మాన్ ఈ లెజెండరీ నటుడి పాత్రలో కనిపించనున్నారని తమిళ సినీ వర్గాలు చెబుతున్నాయి. ఇది నిజమైతే, దుల్కర్ కెరీర్‌లో మరో మైలురాయిగా నిలుస్తుంది.