బర్త్‌డే సెలబ్రేషన్స్ ఓకే.. ‘జైలర్ 2’పై క్లారిటీ ఎప్పుడు?

సూపర్ స్టార్ రజినీకాంత్ హీరోగా దర్శకుడు నెల్సన్ దిలీప్ కుమార్ తెరకెక్కించిన ‘జైలర్’ చిత్రం భారీ విజయాన్ని అందుకున్న సంగతి తెలిసిందే. ఈ విజయంతో ‘జైలర్ 2’పై ప్రేక్షకుల్లో భారీ అంచనాలు నెలకొన్నాయి. దక్షిణాది సినీ అభిమానులు ఎంతో ఆసక్తిగా ఎదురుచూస్తున్న ఈ సీక్వెల్‌కు సంబంధించి ఇప్పటివరకు ఎలాంటి అధికారిక విడుదల తేదీని మేకర్స్ ప్రకటించలేదు. దీంతో సినిమాపై ఉత్కంఠ మరింత పెరిగింది.

తాజాగా దర్శకుడు నెల్సన్ దిలీప్ కుమార్ పుట్టినరోజు సందర్భంగా అభిమానులు ‘జైలర్ 2’కు సంబంధించిన ప్రత్యేక అప్‌డేట్ కోసం ఎదురుచూశారు. అయితే చిత్రబృందం కేవలం పుట్టినరోజు శుభాకాంక్షలకే పరిమితమైంది. సినిమా విడుదలపై లేదా తదుపరి ప్రగతిపై ఎలాంటి సూచన ఇవ్వలేదు. మరోవైపు ఈ చిత్రానికి సంబంధించి కొన్ని సన్నివేశాలు రీషూట్ జరుగుతున్నాయనే ప్రచారం కూడా సినీ వర్గాల్లో వినిపిస్తోంది. అయితే దీనిపై అధికారిక స్పష్టత రావాల్సి ఉంది. అనిరుధ్ సంగీతం అందిస్తున్న ఈ చిత్రాన్ని సన్ పిక్చర్స్ నిర్మిస్తోంది.