ఆషికా ఖాతాలో మరో క్రేజీ ప్రాజెక్ట్

‘నా సామిరంగ’, ‘అమిగోస్’ చిత్రాలతో తెలుగు ప్రేక్షకులకు దగ్గరైన కన్నడ భామ ఆషికా రంగనాథ్ టాలీవుడ్‌లో వరుస అవకాశాలతో దూసుకెళ్తోంది. తాజాగా యంగ్ హీరో శ్రీవిష్ణుకు జోడీగా నటించే అవకాశం దక్కినట్లు నెట్టింట వార్తలు వైరల్ అవుతున్నాయి. సితార ఎంటర్‌టైన్‌మెంట్స్ బ్యానర్‌పై తెరకెక్కుతున్న ప్రొడక్షన్ నంబర్ 39లో ఆషికా రంగనాథ్ హీరోయిన్‌గా ఎంపికైనట్లు తెలుస్తోంది. ‘అనగనగా’ ఫేమ్ సన్నీ సంజయ్ దర్శకత్వం వహిస్తున్న ఈ సినిమా షూటింగ్ ఇప్పటికే ప్రారంభమై శరవేగంగా కొనసాగుతోంది.

నేటి తరం యువత జీవితంలోని సమస్యలు, సంబంధాల్లోని భావోద్వేగాల చుట్టూ ఈ కథ సాగనున్నట్లు సమాచారం. ఇటీవల విడుదలైన గ్లింప్స్ సినిమాపై అంచనాలను పెంచింది. సూర్యదేవర నాగవంశీ సమర్పణలో హారిక సూర్యదేవర నిర్మిస్తున్న ఈ ప్రాజెక్ట్‌లో ఆషికా ఎంట్రీతో హైప్ మరింత పెరిగింది. ప్రస్తుతం సర్దార్ 2, విశ్వంభర వంటి చిత్రాలతో పాటు తెలుగు, కన్నడ, తమిళ చిత్ర పరిశ్రమల్లో వరుస అవకాశాలు అందుకుంటూ ఆషికా తన క్రేజ్‌ను మరింత పెంచుకుంటోంది.