కూతురి కలకు లారెన్స్ గ్రీన్ సిగ్నల్..

కొరియోగ్రాఫర్, నటుడు, దర్శకుడు మరియు నిర్మాతగా తనకంటూ ప్రత్యేక గుర్తింపు తెచ్చుకున్న రాఘవ లారెన్స్ ప్రస్తుతం ‘కాంచన-4’, ‘బెంజ్’, ‘కాలభైరవ’ వంటి చిత్రాలతో బిజీగా ఉన్నారు. ఇదే సమయంలో ఆయన కుటుంబం నుంచి మరో కొత్త ప్రతిభ సినీ రంగంలోకి అడుగుపెట్టబోతున్నట్లు సమాచారం. లారెన్స్ కూతురు రాఘవి హీరోయిన్‌గా కాకుండా దర్శకురాలిగా ఇండస్ట్రీకి పరిచయం కానున్నట్లు టాక్ వినిపిస్తోంది.

చిన్నప్పటి నుంచే సినిమా మేకింగ్‌పై ఆసక్తి ఉన్న రాఘవి, అమెరికాలో డైరెక్షన్ మరియు ఫిల్మ్ టెక్నాలజీకి సంబంధించిన ప్రత్యేక కోర్సు పూర్తి చేసినట్లు తెలుస్తోంది. అసిస్టెంట్ డైరెక్టర్‌గా పని చేయకుండానే నేరుగా దర్శకురాలిగా తన తొలి ప్రాజెక్ట్‌ను ప్రారంభించేందుకు సిద్ధమవుతున్నట్లు సమాచారం. కూతురి నిర్ణయానికి లారెన్స్ కూడా పూర్తి మద్దతు తెలుపగా, ఆమె తొలి చిత్రాన్ని స్వయంగా నిర్మించనున్నట్లు సినీ వర్గాల్లో చర్చ జరుగుతోంది.