డీలిమిటేషన్‌ బిల్లును వ్యతిరేకిస్తున్నాం : ఖర్గే

నియోజకవర్గాల పునర్విభజన (డీలిమిటేషన్) బిల్లును వ్యతిరేకించాలని కాంగ్రెస్ పార్టీ నిర్ణయం తీసుకున్నట్లు ఆ పార్టీ జాతీయ అధ్యక్షుడు మల్లికార్జున ఖర్గే తెలిపారు. అయితే మహిళా రిజర్వేషన్ బిల్లుకు తాము మద్దతు ఇస్తున్నామని స్పష్టం చేశారు. బిల్లు ప్రవేశపెట్టిన విధానంపై తమకు అభ్యంతరాలు ఉన్నాయని, కేంద్ర ప్రభుత్వం రాజకీయ దురుద్దేశంతో ఈ చర్యలకు దిగుతోందని ఖర్గే ఆరోపించారు.

దిల్లీలో జరిగిన ఇండియా కూటమి సమావేశం అనంతరం మీడియాతో మాట్లాడిన ఖర్గే, ప్రతిపక్షాలను బలహీనపర్చడానికే ప్రభుత్వం ఈ బిల్లులను తీసుకువస్తోందని విమర్శించారు. మహిళా రిజర్వేషన్ అంశానికి మద్దతు ఉన్నప్పటికీ, జనాభా లెక్కలు పూర్తి కాకుండానే డీలిమిటేషన్‌ను చేర్చడం సరికాదని అభిప్రాయపడ్డారు. పార్లమెంటు అధికారాలను కార్యనిర్వాహక వ్యవస్థ తన చేతుల్లోకి తీసుకుంటోందని, అన్ని విపక్ష పార్టీలు ఐక్యంగా పోరాడాలని పిలుపునిచ్చారు.