సత్యసాయి సంజీవని ఆసుపత్రిలో హరీష్ రావుతో విజయ్ దేవరకొండ..

సిద్దిపేట జిల్లా కొండపాకలోని శ్రీ సత్యసాయి సంజీవని చైల్డ్ హార్ట్ కేర్ అండ్ రీసెర్చ్ సెంటర్లో నిర్వహించిన 'గిఫ్ట్ ఆఫ్ లైఫ్' సేవా కార్యక్రమంలో సినీ నటుడు విజయ్ దేవరకొండ, మాజీ మంత్రి హరీష్ రావు కలిసి పాల్గొన్నారు. పుట్టుకతో గుండె సంబంధిత సమస్యలతో బాధపడుతున్న పేద చిన్నారులకు పూర్తిగా ఉచితంగా అత్యాధునిక హార్ట్ సర్జరీలు అందిస్తున్న ఆసుపత్రిని వారు సందర్శించి, చికిత్స పొందుతున్న చిన్నారులను, వారి కుటుంబ సభ్యులను పరామర్శించారు.

ఈ సందర్భంగా హరీష్ రావు మాట్లాడుతూ సత్యసాయి ట్రస్ట్ అందిస్తున్న ఉచిత వైద్య సేవలను ప్రశంసించారు. పుట్టపర్తిలోని శ్రీ సత్యసాయి విద్యాసంస్థలో చదువుకున్న విజయ్ దేవరకొండ తన చిన్ననాటి అనుబంధాన్ని గుర్తుచేసుకుంటూ భావోద్వేగానికి గురయ్యారు. చిన్నారులకు కొత్త జీవితాన్ని అందిస్తున్న ఈ సేవా కార్యక్రమంలో భాగస్వామ్యం కావడం తనకు గౌరవంగా భావిస్తున్నట్లు తెలిపారు. ఈ కార్యక్రమానికి సంబంధించిన ఫొటోలు, వీడియోలు ప్రస్తుతం సోషల్ మీడియాలో వైరల్ అవుతున్నాయి.