తెలుగు రాష్ట్రాల్లో కూరగాయల ధరల మంట.. సామాన్యులకు షాక్!

ఆంధ్రప్రదేశ్, తెలంగాణ రాష్ట్రాల్లో కూరగాయల ధరలు పెరుగుతుండటంతో సామాన్య ప్రజలు తీవ్ర ఇబ్బందులు ఎదుర్కొంటున్నారు. వర్షాభావ పరిస్థితులు, పంట దిగుబడులు తగ్గడం, ఎల్‌నినో ప్రభావం వంటి అంశాలు సరఫరాపై ప్రభావం చూపుతున్నాయని చెబుతున్నారు. మరోవైపు పండుగల సమయంలో డిమాండ్ పెరగడంతో మార్కెట్లలో ధరలు మరింత పెరిగాయి. నిత్యం వంటల్లో ఉపయోగించే కూరగాయలు, ఇతర దినుసుల ధరలు కూడా అధికంగా ఉండటంతో మధ్యతరగతి కుటుంబాల నెలవారీ ఖర్చులు పెరుగుతున్నాయి.

హైదరాబాద్‌లోని కూకట్‌పల్లి మోడల్ రైతు బజార్‌లో కిలో టమాటా, వంకాయ ధర రూ.23గా ఉండగా, బెండకాయ రూ.40, పచ్చిమిర్చి రూ.50, బీన్స్ రూ.45, బజ్జి మిర్చి రూ.82, క్యాప్సికం రూ.60గా నమోదయ్యాయి. ఉల్లిపాయలు రైతు బజార్‌లో కిలో రూ.40కు విక్రయిస్తుండగా, బహిరంగ మార్కెట్లలో రూ.70 వరకు పలుకుతున్నాయి. పాత అల్లం రూ.180, కొత్త అల్లం రూ.120, వెల్లుల్లి రూ.260, ఎండుమిర్చి రూ.280కు చేరాయి. విజయవాడలో టమాటా కిలో రూ.31, క్యారెట్ రూ.48, క్యాప్సికం రూ.68గా ఉండగా, బీన్స్ ధర రూ.95కు చేరింది. అక్కడ రైతు బజార్లలో ఉల్లిపాయలు రూ.35 నుంచి రూ.50 వరకు, కొన్ని వీధి దుకాణాలు, కిరాణా షాపుల్లో రూ.70 వరకు విక్రయిస్తున్నారు. మార్కెట్లను బట్టి ధరల్లో తేడాలు ఉండొచ్చు. సరఫరా మెరుగుపడితేనే ధరలు తగ్గే అవకాశం ఉందని వ్యాపారులు చెబుతున్నారు.