భారతీయ విద్యార్థులకు అమెరికా కొత్త షరతులు..

అమెరికాలో ఉన్నత విద్య కోసం వెళ్లే విదేశీ విద్యార్థులకు గరిష్ఠంగా నాలుగేళ్ల నివాస కాలపరిమితి విధించే కొత్త నిబంధనలను అమెరికా హోంలాండ్ సెక్యూరిటీ విభాగం (DHS) ప్రతిపాదించింది. ప్రస్తుతం కాంగ్రెస్ పరిశీలనలో ఉన్న ఈ ప్రతిపాదన ఆమోదం పొందితే, నాలుగేళ్లకు మించి అమెరికాలో కొనసాగాలనుకునే విద్యార్థులు మళ్లీ ప్రత్యేక అనుమతి పొందాల్సి ఉంటుంది. ప్రస్తుతం అమల్లో ఉన్న "డ్యురేషన్ ఆఫ్ స్టేటస్ (D/S)" విధానం రద్దుకానుండటంతో అమెరికాలో చదువుతున్న సుమారు 3.3 లక్షల మంది భారతీయ విద్యార్థులపై ఈ మార్పు ప్రభావం చూపే అవకాశం ఉంది.

కొత్త ప్రతిపాదనల ప్రకారం జే-1 ఎక్స్ఛేంజ్ విజిటర్లు, ఐ వీసాపై వెళ్లే విదేశీ మీడియా ప్రతినిధులకు కూడా నిర్దిష్ట కాలపరిమితి అమలు చేయనున్నారు. ఇదే సమయంలో ప్రభుత్వ సంక్షేమ పథకాల ప్రయోజనాలు పొందే వలసదారులకు గ్రీన్ కార్డులు నిరాకరించే "పబ్లిక్ ఛార్జ్" విధానాన్ని కూడా పునరుద్ధరించాలని అమెరికా ప్రభుత్వం ప్రతిపాదించింది. ఆహార స్టాంపులు, మెడికెయిడ్, హౌసింగ్ వోచర్లు వంటి ప్రభుత్వ ప్రయోజనాలు పొందేవారిపై ఈ నిబంధన వర్తించే అవకాశం ఉంది. అయితే ఈ ప్రతిపాదనలు కాంగ్రెస్ ఆమోదం పొందిన తర్వాతే అమల్లోకి వస్తాయి.