పంటలు ఎండిపోకుండా నిరంతర విద్యుత్ సరఫరా చేయాలి - సీఎం రేవంత్ రెడ్డి

రాష్ట్రంలో నెలకొన్న వర్షాభావ పరిస్థితుల నేపథ్యంలో రైతుల పంటలు ఎండిపోకుండా నిరంతర విద్యుత్ సరఫరా చేయాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. పంటలు చేతికొచ్చే వరకు విద్యుత్ కోతలు లేకుండా చూడాలని స్పష్టం చేశారు. రాబోయే 20 రోజులు పంటలకు అత్యంత కీలకమని, విద్యుత్ కొరత కారణంగా రైతులు పంట నష్టపోకుండా చర్యలు తీసుకోవాలని సూచించారు. వ్యవసాయానికి విద్యుత్ అవసరం ఎక్కువగా ఉన్న ప్రాంతాలను గుర్తించి సరఫరాను పెంచాలని ఆదేశించారు.

ఎల్‌నినో ప్రభావం, వర్షాభావ పరిస్థితులు, విద్యుత్, తాగునీటి సరఫరాపై ఉన్నతాధికారులతో నిర్వహించిన సమీక్షలో సీఎం విద్యుత్ అంతరాయాలపై తీవ్ర అసంతృప్తి వ్యక్తం చేశారు. పలుమార్లు ఆదేశించినా సరఫరాలో మార్పు ఎందుకు రావడం లేదని అధికారులను ప్రశ్నించారు. బొగ్గు సరఫరాకు ఏర్పాట్లు చేసినప్పటికీ యాదాద్రి విద్యుత్ ప్లాంట్‌లో పూర్తి సామర్థ్యంతో ఉత్పత్తి ఎందుకు జరగడం లేదని ఆరా తీశారు. నిర్లక్ష్యాన్ని సహించబోనని, అవసరమైతే ఉన్నతాధికారులను సస్పెండ్ చేస్తానని హెచ్చరించారు. ఎల్‌నినో పరిస్థితులను కోవిడ్ తరహా విపత్తుగా పరిగణించి అన్ని శాఖలు అప్రమత్తంగా ఉండాలని సూచించారు.

వచ్చే జూన్ వరకు తాగునీరు, పశుగ్రాసం కొరత తలెత్తకుండా పటిష్ఠమైన కార్యాచరణ ప్రణాళికలు రూపొందించాలని సీఎం ఆదేశించారు. గ్రేటర్ హైదరాబాద్‌లో నిర్మాణ రంగం వంటి అవసరాలకు శుద్ధి చేసిన మురుగునీటిని వినియోగించేలా చర్యలు చేపట్టాలని సూచించారు. ప్రతి మండలానికి గ్రూప్-1, గ్రూప్-2 స్థాయి అధికారులను నియమించి పరిస్థితులను పర్యవేక్షించాలని, నివేదికలను ఎప్పటికప్పుడు ప్రభుత్వ ప్రధాన కార్యదర్శికి అందించాలని ఆదేశించారు. గ్రామసభలు, కళాజాతల ద్వారా ప్రజలకు ఎల్‌నినో ప్రభావం, నీరు మరియు విద్యుత్ పొదుపు ప్రాముఖ్యతపై అవగాహన కల్పించాలని స్పష్టం చేశారు.