లండన్‌ వీధిలో స్పృహ కోల్పోయిన యూఏఈ రాజకుటుంబ సభ్యురాలు..

యునైటెడ్‌ అరబ్‌ ఎమిరేట్స్‌లోని అబుదాబి పాలక రాజకుటుంబంతో వివాహ బంధం ద్వారా సంబంధం ఉన్న 32 ఏళ్ల మహ్రా అల్‌ నహ్యాన్‌.. లండన్‌లో చిన్నారి నిర్లక్ష్యానికి సంబంధించిన కేసులో తన నేరాన్ని అంగీకరించారు. ఈ ఏడాది జూన్‌ 13న పశ్చిమ లండన్‌లోని ఓ రహదారి పక్కన ఆమె స్పృహ కోల్పోయి కనిపించారని కోర్టులో వెల్లడైంది. ఆమె సంరక్షణలో ఉన్న మూడేళ్ల చిన్నారి చెప్పులు లేకుండా, వాహనాల రాకపోకలు సాగుతున్న రహదారికి సమీపంలో ఆడుకుంటున్నట్లు గుర్తించారు. అక్కడికి వచ్చిన స్థానికులు చిన్నారిని సంరక్షిస్తూ పోలీసులకు సమాచారం అందించారు. మహ్రాతో పాటు మరో వ్యక్తి కూడా స్పృహలో లేకుండా కనిపించడంతో చిన్నారి భద్రతకు తీవ్ర ప్రమాదం ఏర్పడిందని విచారణ సందర్భంగా కోర్టు దృష్టికి వచ్చింది.

ఈ కేసులో మహ్రా అల్‌ నహ్యాన్‌కు లండన్‌లోని సౌత్‌వార్క్‌ క్రౌన్‌ కోర్టు రెండేళ్ల కమ్యూనిటీ ఆర్డర్‌ విధించింది. ఇందులో భాగంగా పునరావాస కార్యక్రమాన్ని పూర్తి చేయాల్సి ఉంటుంది. జరిమానా, ప్రాసిక్యూషన్‌ ఖర్చులు కలిపి మొత్తం 6,114 పౌండ్లు చెల్లించాలని ఆదేశించింది. గతంలో కొకైన్‌ వినియోగించినట్లు కోర్టులో ప్రస్తావనకు రాగా, ఘటన జరిగిన రోజున ఆమె మాదకద్రవ్యాలు తీసుకోలేదని, అంతకుముందు రోజుల వినియోగం కారణంగా తీవ్ర అలసటకు గురయ్యారని ఆమె తరఫు న్యాయవాది తెలిపారు. జూలై నుంచి సర్రేలోని పునరావాస కేంద్రంలో చికిత్స పొందుతున్నారని, తన తప్పిదంపై పశ్చాత్తాపం వ్యక్తం చేశారని కూడా కోర్టుకు వివరించారు. చిన్నారిని రద్దీ రహదారి సమీపంలో నిర్లక్ష్యంగా వదిలేయడం ఆమె భద్రత పట్ల తీవ్రమైన నిర్లక్ష్యాన్ని చూపిస్తోందని న్యాయమూర్తి వ్యాఖ్యానించారు.