గరుడ సేవ వేళ తిరుపతిలో ట్రాఫిక్ ఆంక్షలు

తిరుమల శ్రీవారి నవరాత్రి బ్రహ్మోత్సవాల్లో అత్యంత ముఖ్యమైన గరుడ వాహనసేవ ఈరోజు జరగనుంది. ఈ సందర్భంగా లక్షలాది మంది భక్తులు తిరుపతి మీదుగా తిరుమలకు చేరుకునే అవకాశం ఉండటంతో ట్రాఫిక్‌ నియంత్రణకు కట్టుదిట్టమైన భద్రతా ఏర్పాట్లు చేపట్టినట్లు ఎస్పీ సుబ్బరాయుడు తెలిపారు. ఈరోజు తిరుమలకు ఆర్టీసీ, టీటీడీ వాహనాలు మినహా ప్రైవేటు వాహనాలకు అనుమతి ఉండదని వెల్లడించారు. గురువారం రాత్రి 9 గంటల నుంచి శనివారం ఉదయం 6 గంటల వరకు తిరుమల ఘాట్‌ రోడ్డులో ద్విచక్ర వాహనాల రాకపోకలను నిషేధించారు. ద్విచక్ర వాహనాలు, యాత్రికుల బస్సులు, ఇతర వాహనాల కోసం తిరుపతిలో పలు ప్రాంతాల్లో ప్రత్యేక పార్కింగ్‌ సదుపాయాలు ఏర్పాటు చేశారు.

ద్విచక్ర వాహనదారుల కోసం బాలాజీ లింక్‌ బస్టాండ్‌, నెహ్రూ మున్సిపల్‌ గ్రౌండ్‌, ఎస్వీ వైద్య కళాశాల, ఇస్కాన్‌ గ్రౌండ్‌లలో పార్కింగ్‌ ఏర్పాటు చేశారు. యాత్రికుల బస్సులకు జూపార్కు రోడ్డులోని దేవలోక్‌, ట్రిడెంట్‌, మ్యాంగో మార్కెట్‌ వద్ద, కార్లకు భారతీయ విద్యాభవన్‌, అలిపిరి లింక్‌ బస్టాండ్‌, ఎస్వీ ఇంజినీరింగ్‌ కళాశాల మైదానాల్లో పార్కింగ్‌ సదుపాయాలు కల్పించారు. అక్కడి నుంచి తిరుమలకు చేరుకునేందుకు ఆర్టీసీ బస్సులు అందుబాటులో ఉంటాయి. పార్కింగ్‌ వివరాలను క్యూఆర్‌ కోడ్‌ల ద్వారా సామాజిక మాధ్యమాలు, ఫ్లెక్సీలపై అందుబాటులో ఉంచారు. చిత్తూరు, మదనపల్లె నుంచి వచ్చే బస్సులు కాలూరు క్రాస్‌, ఆర్సీపురం జంక్షన్‌ మీదుగా, చెన్నై, పుత్తూరు నుంచి వచ్చే బస్సులు సింధు ఫ్లైఓవర్‌, తనపల్లె జంక్షన్‌ మీదుగా, కడప, శ్రీకాళహస్తి నుంచి వచ్చే బస్సులు రమణ విలాస్‌ జంక్షన్‌, గాజులమండ్యం సర్కిల్‌, తనపల్లె జంక్షన్‌ మీదుగా గరుడ ఫ్లైఓవర్‌ చేరుకుని ఆర్టీసీ బస్టాండ్‌కు వెళ్లాలని పోలీసులు సూచించారు.