హైదరాబాద్‌లో ‘ఇందిరమ్మ ఇండ్లు’ స్కీమ్ షురూ

హైదరాబాద్ నగర పరిధి (CURE ఏరియా)లో ఆర్థికంగా అందుబాటు ధరల్లో గృహాలను అందించేందుకు తెలంగాణ ప్రభుత్వం, తెలంగాణ హౌసింగ్ బోర్డు (TGHB) ఆధ్వర్యంలో ‘ఇందిరమ్మ ఇండ్లు’ హౌసింగ్ టవర్స్ పథకానికి డిమాండ్ సర్వే ప్రారంభించి, పూర్తి వివరాలతో కూడిన బ్రోచర్‌ను విడుదల చేసింది. తొలి దశలో 16 ప్రాంతాల్లో 7,680 ఫ్లాట్ల నిర్మాణం చేపట్టనున్నారు. ఒక్కో ఫ్లాట్ 528 చదరపు అడుగుల విస్తీర్ణం, 400 చదరపు అడుగుల కార్పెట్ ఏరియా కలిగి ఉంటుంది. ప్రభుత్వం ఒక్కో ఫ్లాట్‌కు రూ.5 లక్షల సబ్సిడీతో పాటు భూమి ఖర్చును పూర్తిగా భరిస్తుండగా, లబ్ధిదారుడు సుమారు రూ.6 లక్షలు చెల్లించాల్సి ఉంటుంది.

దరఖాస్తుదారు గత 10 సంవత్సరాలుగా హైదరాబాద్ CURE ప్రాంతంలో నివసిస్తూ ఉండాలి, కుటుంబానికి ఇల్లు, ఫ్లాట్ లేదా స్థలం ఉండకూడదు. కుటుంబ వార్షిక ఆదాయం రూ.6 లక్షల లోపు ఉండాలి. మీ సేవ కేంద్రాలు లేదా MeeSeva WhatsApp ద్వారా రూ.100 దరఖాస్తు రుసుము, తిరిగి చెల్లించే రూ.10,000 టోకెన్ అడ్వాన్స్‌తో దరఖాస్తు చేసుకోవచ్చు. దరఖాస్తుల పరిశీలన, 360 డిగ్రీల ధృవీకరణ అనంతరం అవసరమైతే లాటరీ ద్వారా ఫ్లాట్లను కేటాయిస్తారు. ఎస్సీ, ఎస్టీ, బీసీ, దివ్యాంగులు, అవుట్‌సోర్సింగ్ ఉద్యోగులు, నాలుగో తరగతి ఉద్యోగులు, పారిశుద్ధ్య కార్మికులకు రిజర్వేషన్లు ఉండగా, మొత్తం రిజర్వేషన్‌లో 30 శాతం మహిళలకు కేటాయించనున్నారు.